on.cc 東方互動主頁

40cm Macross噸位夠大

年關未到，超時空粉絲就要財政告急，事關傳咗好耐嘅Yamato 1/3,000完全變形SDF-1 Macross，已經到港上架！雖然Wave之前都出過1/5,000嘅完全變形版，但係論身形、Detail位同質感，都到喉唔到肺，今次嘅1/3,000，有成40cm咁高，噸位大，雕工仲夠晒細緻，難怪標價高達$3,280，都有大把粉絲爭落訂，節衣縮食也在所不計。

磁石關節Hold得住

話明完全變形，梗係第一時間試吓變身機關，呢隻Macross有兩大新賣點，第一係「OTM艦首炮擊系統」，以往艦首嘅左右結合只係靠一連串榫位，變得多，唔斷都會刮花，今次就改用磁石解決問題。另一新賣點係雙臂都用埋磁石，貼實戰艦形嘅前臂，擺甫士都夠力Hold住，唔會「條條Fing」。除此之外，手腳多個位置都用咗齒輪關節，唔會咁易扭斷，新手都可以放心玩。

金屬色炮口引擎

之前1/5,000嘅比例較細，細節位只算一般，今次嘅1/3,000就唔同喇，灰色艦身布滿線位，所有炮台亦以額外部件裝嵌，夠晒質感，而且心口兩排八個OT誘導集束光線炮口，以及腳部12組推進引擎，都用埋金屬色，遠睇仲以為係合金料。原來除咗軀體骨架用合金，其他地方都係ABS膠料，拎上手未夠重量感，最得人驚係艦橋牙籤咁幼嘅天線位，唔用金屬、又唔用軟膠，好易斷，好彩隨盒跟兩包「士啤Parts」，算係補飛啦。