先收風 買新車有分數

話咁快就一年喇，大家又有乜新年大計呢？買樓結婚生仔？似乎沉重咗啲喎，有冇諗過出番部車，當獎勵自己喺過去一年嘅努力呢？其實2011未到，多間歐日車廠已經「放風」，透露今年嘅新車動向，就以今次精選嘅六大陣營為例，都大有機會來港，車迷不妨刨熟本文，早早決定今年嘅出車目標吧！

全球經濟持續復甦，為奢侈品零售市場起到推動作用，香港都唔例外，同2009年相比，本港去年嘅汽車銷量就錄得雙位數字增長。雖然唔少事先張揚嘅2011新車，至今仲未現真身，只有電腦模擬圖或海外傳媒拍到嘅「Spy Photo」，但既然勢頭咁好，車廠又點會放棄賺錢機會！依家就揭開廠方故作神秘嘅面紗，嚟個2011新車預覽啦！

開篷陣營

BMW 6 Series Convertible 邊行邊變身

全新嘅6系Convertible採用電動軟篷設計，閂篷時間只需19秒，而且喺車速40km/h下，都可以一邊行、一邊「變身」。有消息指首批上市嘅型號分別係640i及650i，後者搭配4.4公升V8 Turbo引擎，馬力413bhp，0100km/h只需5.0秒，係一款集霸氣與高性能於一身嘅豪華開篷車。

推出日期：預計今年三月率先於歐美上市

Mercedes-Benz SLK 疑似袖珍SLS

近排唔少人已經談論起第三代SLK，但至今仲未有正式嘅官圖發布，只能從網上搵到一啲疑似嘅官方宣傳短片。不過從中都可以睇到，車頭造型導入咗SLS嘅風格，車頂依然係硬摺篷，行李箱容積就有317公升，載量之大同級少見。外間估計新SLK將搭配3.0公升V6 Turbo引擎，馬力喺300至350bhp之間。

推出日期：預計今年三月在日內瓦車展率先發表

街跑陣營

Toyota FT-86 後繼有人

FT-86至今仍屬概念車階段，所以仲未有確實嘅量產時間表，不過好多人估計喺今年尾推出。據知FT-86嘅車身尺寸為4,160×1,760×1,260mm（長×闊×高），動力系統可能會採用「技術交流」，移植富士（Subaru）嘅2.0公升水平對向四缸引擎，波箱係六前速手波。由於FT-86採用後驅布局，故有人視為AE-86嘅後繼者，睇怕會吸引到唔少《頭文字D》嘅粉絲高度注視。

推出日期：預計年尾發表

SUV陣營

Audi Q3 四驅生力軍

體積略細於現行嘅Q5，估計外觀與2007年發表嘅Cross Coupe Concept相近，至於車身尺碼及配備仍有待公布。不過，有傳Q3會採用Haldex四驅系統，並搭配2.0公升TFSI直四引擎，馬力211bhp，仲有望落埋新一代S-Tronic雙離合器波箱。

推出日期：預計今年三月在日內瓦車展率先發表，年中在歐洲上市。

混能陣營

Lexus CT200h 混能高層次

CT200h係凌志首款「Full Hybrid」豪華揭背車，車身長、闊度分別係4,320mm及1,765mm，定位為Premium Compact，除咗設備比一般Hatchback高檔外，亦相當重視操控表現。廠方指出CT200h在滿電狀態下以純電力行駛，極速去到45km/h。

推出日期：預計本月在港推出

小房車陣營

Volkswagen Jetta 家庭車生力軍

去年六月，廠方已經喺美國發表咗新一代Jetta，相信今年內就可抵港。車身體積有明顯增長，車長達到4,640mm，介乎於Golf與Passat之間，填補廠方喺小房車市場嘅空缺。現時汽油版Jetta有四款TSI引擎選擇，馬力由105bhp至200bhp不等，可配七前速DSG波箱，進一步降低耗油量。

推出日期：去年10月在歐洲上市，預計今年內抵港。

超跑陣營

Lamborghini LP570-4 Spyder Performante

細牛升呢

開篷細牛嘅高性能版本，車身採用輕量化鋁材及碳纖維物料，比標準版輕咗65kg。動力方面，5.2公升V10引擎可爆出570bhp馬力及55.0kgm扭力，配合六前速E-Gear波箱，0-100km/h只需3.9秒，極速324km/h。

推出日期：預計今年內上市