裸眼3D手機來年最爆

一覺瞓醒已經踏新一年，若果問科技界有乜新嘢玩，點都唔會答一街都係嘅iPhone 4，或者要戴眼鏡先睇到嘅3D電視機，皆因今年無論係手機、相機以至愈來愈多人用嘅Tablet，都有唔少技術突破，趁新的一年剛剛開始，就等小記用水晶球來為大家預測一下啦!

去年可以話係3D嘅世界，由電影玩到電視同相機，咁仲未夠，事關今年裸眼3D手機先開始登場；另外，發展咗近三年嘅Android終於到咗收成期，仲會喺Tablet界大發神威；加埋傳聞Canon同Nikon都會加入無鏡相機戰團，認真精彩！

通訊篇手機裸眼睇3D

成日都話睇3D，但仲係要戴眼鏡先睇到，計我話一啲都唔Free，好在唔少日韓系廠都部署推出裸眼3D手機，唔使戴特製眼鏡都睇到立體效果。另外，Android仲話佢哋個Android Market會係大家發展3D技術嘅福地，睇嚟今年將會係3D手機百花齊放嘅一年。

智能平台混戰

去年iPhone 4一出，小記身邊唔少朋友仔已經變成半個Apple信徒，不過憑強大搜尋器打響名堂嘅Google亦冇放慢手腳，三年前開始推出嘅Android平台亦漸成氣候，年底前仲升級至最新嘅2.3「薑餅」系統，加埋Windows Phone 7嘅醒覺，以及一代手機掌門諾基亞嘅Symbian^3系統逐漸成形，智能手機平台大戰又再展開！

4G單撈快10倍

正式宣布會喺第一季推出嘅4G技術，選用LTE/DC-HSPA+網絡，上下載速度分別可達38Mbps同100Mbps，比起依家用緊嘅3G快10倍，發展順利嘅話，話唔定年底就會有手機支援得到。

電腦篇大廠Tablet現身

自從Android話會推出真正為Tablet而設嘅Honeycomb系統，終於見到Motorola、Sony同Acer等大廠出機，而且高階機種仲會選用NVIDIA Tegra 2 1GHz雙核心處理器、10點觸控以及1,280×800高清屏幕，至於Android團長Andy Rubin更喺發布會上攞住部機身超薄嘅Android Tablet，真係引死隔籬。

影像篇無鏡相機大熱

貌似兒戲嘅無鏡（Mirrorless）系統，估唔到過去兩年都大收旺場，依家只剩番兩大巨頭Canon同Nikon未有落疊。不過傳聞Nikon已研發緊按鈕式變焦功能，大大提升拍攝短片嘅操控同流暢性，加上無鏡機身，同鏡頭嘅無敵景深效果，隨時勁過一般民用DV！

全民玩Full Frame

經過多年研發，各廠商嘅影像處理技術距離已經拉近好多，唔難想像佢哋會將追求拍攝質素嘅朋友推向Full Frame層面。當中，相信Nikon已經準備好推出傳說中嘅D800，備有1,620萬像素、Multi-Cam 3500FX 51點自動對焦、加埋已作大幅改良嘅AF-F全時間對焦系統，相信會係Nikon首部支援1,080p全高清短片嘅全片幅相機！

iPad加前後置鏡頭

不過，對手iPad又點會企喺度任你打，據網上流出嘅相片，第二代iPad會追加前置及後置鏡頭，玩FaceTime啱晒！另外，亦有傳聞話會改用更快的處理器、加大記憶體容量以應付愈來愈普及的多工應用，仲會追加USB／SD卡插槽，甚至跟iPhone 4一樣換上Retina顯示屏，最重要嘅係第一季就會開賣，各位Apple信徒到時又準備奉獻啦！