靚畫Tales of Graces f 易服玩Cosplay

雖然剛剛過咗聖誕，元旦又有假期，如果唔想出街玩，留喺屋企打機就最啱嘞！鍾意打機嘅朋友可能忽略咗，12月除咗《芒亨》同《高達無雙》出爐之外，其實仲有隻老牌RPG老早見街，識貨嘅朋友一見即掃，老闆入一水就賣一水，都估唔到咁好賣！之唔係加入咗好多耐玩元素，傳奇系列最新作《TOGf》！

其實《TOGf》唔可以話係全新作，因為佢係以舊年尾Wii版做基礎，畫面重製強化嘅移植作。配合番PS3圖像處理技術，像素「升晒呢」，再加插咁多個角色重製嘅絕招畫面同支線任務。而「換衫系統」更追加新服飾，跟其他作品大玩Cosplay Crossover！最後就唔少得本篇故事追加新劇情啦！所以玩過Wii版嘅朋友，可以當呢隻Game係全新咁煲都仲得。

戰友們再次集合

玩過Wii版嘅粉絲都知道，故事結局好似仲有唔少謎團未解，同主角訣別嘅失憶少女蘇菲，今次會擔大旗繼續冒險旅程。新故事「邁向未來之族譜篇」係描述本篇結局後半年嘅世界，雖然主角一行人成功避免「埃菲尼亞」滅亡，但係魔物餘黨依然橫行，為咗要討伐魔物，一班分道揚鑣嘅戰友們再次集合。同時離開咗男主角嘅蘇菲，忽然又出現，莫非係同佢失憶之謎有關！故事將會追加新冒險地圖，劇情對話亦會大幅增加，收錄配音甚多，呢次移植作可謂交足功課！

男女主角Chok新招

玩開《Tales》系列都知道，最刺激好玩就係切入戰鬥狀態，因為可以因應情況變化隨時切換人物嚟控制，而且被選擇嘅角色會變咗動作Game咁，畀大家隨便控制，又劈又避，相當過癮。而於戰鬥當中，人物儲滿咗「原素計」，就可以發動「原素昇華」狀態，呢個時候就可以出奧義絕招，對敵人造成莫大傷害！當然移植到PS3，戰鬥畫面同絕招效果將會以HD畫質重現，而且所有主角更會有多一招「秘奧義」，另外發動時嘅大頭特寫亦係重新繪製，迫力十足。

下載服裝包扮貓扮初音

《TOGf》亦強化咗支線任務，去交代每位角色不為人知嘅一面。不過大家其實唔使玩齊所有支線任務，因為跟本篇故事冇關，亦唔影響故事推展嘅進度，不過就會拎少咗好多珍貴道具同稱號喇！提起稱號，《TOGf》中嘅稱號系統唔只係「名稱」咁簡單，因為有啲「變身稱號」仲可以改變角色服裝，增加遊玩嘅樂趣。而且今次仲同多個動漫作品Crossover，仲會一路推出唔少畀錢下載既「服裝包」，大家就可以幫角色換成「Toro貓」、「初音未來」等搞鬼造型！

遊戲檔案

名　　稱：《Tales of Graces f》

類　　別：角色扮演

人　　數：1人

機　　種：PS 3

發行公司：Bandai Namco Games

日　　期：已推出

售　　價：$459

查　　詢：2418 8896