經典重現 Virtual On 4 Force　4P大戰

有番咁上下機齡嘅機迷，可能都曾經沉迷過動作射擊街機遊戲《Virtual On》，玩法同現時Gundam街機版差唔多。Sega終於在年底前將呢套經典遊戲帶到Xbox 360之中，改成《Virtual On 4 Force》，以街機版ver 7.7做基礎，收錄多達91款機體，而且可透過Xbox LIVE挑機，最多支援4人連線對戰，打到飛起！

首見於1995年的《Virtual On》系列，今年是15周年紀念，所以Sega把這套經典遊戲移植到家用平台上。今集《Virtual On 4 Force》係以2001年推出的街機版《Virtual On》做基礎，然後再進行強化，在Xbox 360的機能下，可以做到極爽快的瞬間移動殺敵，令到一班當年花過唔少銀仔煲機的老機迷打得仲開心。雖然話係移植版，但係家用版遊戲在設計上都有作出改動，包括減低以往街機版的困難程度，仲加入了連線打法，安坐家中都可以同朋友玩4P。

更易儲齊91機體

《Virtual On 4 Force》的任務模式係以街機版的特別任務模式做藍本，要在森林及基地下以不同條件戰鬥，而且仲可以隨時加入戰鬥，唔似當年街機版要達成特別條件先可以開啟特別任務咁高難度。另外，要得到特殊機體嘅難度亦減低了，以前即使打完特別任務都未必可以得到新機體，但家用版就唔同，只要完成任務就一定得到新機體，要儲齊91種機體都變得容易咗，而且單人或者連線雙打都同樣可以儲機體添！話就話玩法易咗，但如果大家只係初接觸《Virtual On》仍然會覺得難打，不過只要開啟咗EX Option模式，猶如金手指提升攻擊力同體力的設定，火力加強後更易過關，但相對地要得到罕見機體的機會率就會減低。

新增二打二對戰

當然連線玩法先至係《Virtual On 4 Force》嘅重點所在，遊戲支援到四打玩法，可以連上Xbox LIVE後搵朋友或者其他玩家開戰，亦新加入二對二對戰玩法；但就算係單機玩，都一樣支援到以分割畫面形式進行的四打玩法，不過就睇得辛苦少少喇！在連線玩法上，遊戲與街機版不盡相同，好似打Ranking時，家用版會根據玩家在戰鬥上的各種行動評分，例如計埋命中率、受傷害情況、救援次數等，所以就算打輸了都未必代表攞唔到第一名。如果想玩得盡興一點，可以同時配埋支由Hori推出嘅專用大型Joystick「Twin Stick EX」，更有親身操控機械人嘅感覺，不過官方訂價要成$2,880，貴過《GT5》專用軚盤多多聲，買唔買得過就真係見仁見智。

遊戲檔案

類　　型：動作射擊

開　　發：Sega

平　　台：Xbox 360

推出日期：已推出

售　　價：$328

查　　詢：2620 6667