關楚耀 大背囊有裝載Keep住型
這兩年間關楚耀（Kelvin）好像經歷了很多，變得成熟了，工作範疇擴闊了，但仍然放不低音樂，現正籌備將於來年中推出唱片；但更放不低是一個滿載各種Keep住型Look用品的大背囊，以及大男孩的心境。
經歷過「日本事件」以及工作上的變動後，Kelvin不諱言藉此機會讓自己思考各種問題：「自從日本嗰件事後，呢半年間去過多間學校做分享，嚟緊亦會繼續做落去。而且由於工作上嘅改變，呢一年多咗參與其他不同範疇的工作，嚟緊1月會拍電視劇，預期拍兩個月左右，所以會趁中間的空檔上吓Drama Course，充實自己，最緊要係做好自己，接受唔同嘅挑戰。」所以唱片公司跟電視台未能破冰，他亦未有太在意，反而關心觀眾對現正播映的消防劇集反應如何。
年中出唱片
Kelvin笑說做歌手搵食艱難，但近來已開始做歌，為新碟作準備：「上一張唱片我已開始參與幕後製作，新碟更想參與更多幕後工作。曲風方面希望統一啲，預期明年5、6月會推出，希望能突破以前嘅自己。」說到另一種裝備─隨身裝備，Kelvin笑說因為不時要面對群眾，常常都孭着一個大背囊，將所有美容用品放進袋內，包括補濕噴霧及潤唇膏等；另外，他亦會趁空檔時候看書，充實自己！
1.迷彩化妝袋隨時上妝「本身對化妝無乜偏好，但一做嘢就會拎埋化妝袋。同埋由於Budget問題（笑），通常都係自己化妝，所以成日都會帶住佢周圍走。」
2.補濕噴霧妝後滋潤「由於工作上需要化妝，但通常化完妝後塊面都會好乾，得閒要拎支補濕噴霧出嚟噴幾下補充水分。」
3.潤唇膏15分鐘搽一次「一般人可能一、兩個鐘先搽潤唇膏一次，但我口唇太乾，15分鐘就要搽一次。牌子選擇上亦無特別偏好，最緊要係就手，就算女裝潤唇膏或者有味的都唔拘，但當然唔好有色而且要夠潤啦！」
4.眼藥水為眼睛降溫「工作時會戴Con，但有時工作時間太長，戴得耐，眼睛會痛，就要滴幾滴眼藥水紓緩。之前拍消防劇時，因為拍攝現場溫度太高，恐防副Con會熱到溶，所以一停機就要滴幾滴。」
5.CdG香水氣味好夾「我本身幾喜歡COMME des GARÇONS男士香水，純粹覺得同自己幾夾。」
6.蜥蜴書做個好主人「養了蜥蜴兩個月，所養的亦正正是《The Bearded Dragon Manual》一書封面上的同款蜥蜴，所以依家睇緊呢本書。但蜥蜴並唔易養，要買蟋蟀餵佢，有時會拎佢去窗邊曬吓太陽，會健康啲。」
7.工作書啱心情「閒時都幾鍾意睇書，早前在台灣拍攝MV時，夜晚落了誠品買書，咁啱看見這本《工作！工作！》，睇落又好似幾有趣，而且又幾啱自己當時的心境，就買咗嚟睇。」
8.Locker鎖做Gym保財物「隨身帶住個迷你鎖頭好奇怪？因為去健身中心做運動時好多Locker都無鎖，自己帶定去就萬無一失，做運動時更加安心。」
9.椰汁鍾意飲「點解鍾意飲椰汁？其實無特別原因，就係因為鍾意飲。要影相嗎？咁等你影完我先飲啦！」
10.大背囊夠大襟用「平日鍾意孭背囊，選擇背囊時除咗會睇款式外，最緊要都係夠大同襟用，因為工作時需要帶備大量私人物件！」
