冬日佐幌森林慢騎

甫抵北海道佐幌（Sahoro）當天，適逢初雪，雪未夠厚，滑雪板也派不上用場，幸好下榻的度假村有戶外「餘興」提供，既可策馬踱步森林，又可踩單車上山下斜，冬日北海道，並非只有雪可玩啊！

佐幌離札幌約2小時火車程，是個非常寧靜的小鎮，在新得JR站下車，乘15分鐘巴士便可到達Club Med，度假村既可滑雪，亦有大量戶外活動供住客選擇參加。今年北海道降雪比往年稍遲，Club Med於冬季提供的雪地策馬活動，即使在12月也只能變相為森林策馬，但馬仍是那一隻，一樣騎得咁開心。養馬牧場其實只離度假村5分鐘車程，我們甫下車，一身牛仔裝的馬主已拉着小馬在等我們。

雖說是小馬，但馬身其實比我還高，真正是高頭大「馬」；牠溫柔馴良，任我抽水摸頭摸頸也欣然接受。直至我騎上馬背，為我拖馬的牛女小姐才說小馬其實已16歲，是不折不扣的老馬了，並將屆退休之齡。老馬陪我漫步走過冬日的森林，牠的溫柔，令冬日寒風也變得和暖。

越野單車上山下斜

除了騎馬，度假村還有一樣好好騎的活動，那就是爬山單車。佐幌的風景除上山滑雪時可盡覽外，另一最佳觀賞方法，就是踩單車。度假村免費提供單車、頭盔等裝備，最重要是供應埋教練，帶你做足熱身兼帶路引領大家上山下斜，讓你不用像盲頭烏蠅般亂衝。

單車設有轉波裝置，足夠應付上山下斜的路段，但佐幌單車遊全程其實真正的大斜路不多，車路又不多車，踩單車變得像散步般輕鬆，你大可慢慢欣賞沿路的樹林美景；豈知回程才是真正考驗。回度假村必須走過一段上斜山路，景色一流，但你也無暇欣賞，因為你雙腿已好似摩打，不想推車就得跟山斜拚了，當作滑雪前的熱身吧！

牧場品嘗激鮮牛奶

北海道草靚，牛奶更靚，我早有所聞。今次我們走到佐幌附近的帶廣，到廣瀨牧場看牛牛，並一嘗新鮮牛奶滋味。牧場並非以觀光為主，牛棚內的乳牛隻隻「牛脾氣」沖天，不像動物園的綿羊，可任你摸摸錫錫，不過從牠身上擠出的牛奶，卻是絕對激鮮。

牧場前有間靚靚小木屋，原來是售賣用牧場牛牛鮮奶炮製的雪糕，雪糕味道多得眼花繚亂，由普通牛奶味、藍莓味、咖啡味，到古靈精怪的南瓜味、綠茶味、甚至番薯味都有，即使味道千奇百怪，但香滑口感仍是不變，愛試新口味的朋友肯定不會失望呢。

廣瀨牧場

地　　址：北海道帶廣市西23條南6丁目13

開放時間：10:00am-5:00pm

電　　話：（81）0155 33 6064

網　　址：www.obnv.com/cafe/151

旅遊資訊

旅　遊　資　訊

簽證：持BNO或特區護照均毋須簽證

套票：Club Med佐幌5日4夜假期，成人HK$11,880起，4至11歲小童HK$8,840起，包來回機票、接送、住宿、每日3餐、滑雪活動費用等。現在至2011年4月（指定日期除外），預訂Club Med佐幌滑雪假期，最少住宿3晚，即額外送多1晚住宿，住宿4晚或以上，更送2晚住宿。查詢：3111 9388　網址：www.clubmed.com.hk

貨幣：$100約兌HK$9.4

天氣：1月氣溫約-4℃至2℃

時差：快香港1小時