on.cc 東方互動主頁

型放禮物S60大得起

聖誕節人人想收大禮物，富豪（Volvo）就咗形象年輕、顏色又應節嘅鮮紅版S60 2.0T，唔只揸得開心、坐得舒服，仲有大尾箱畀你放聖誕禮物，過節更有氣氛，送份大禮畀女友都型過人!

咪畀S60個新Look呃到，長車頭、短車尾，仲有C柱嘅大斜背，有型就有型，不過尾箱好似短咗喎，會唔會載少咗嘢？錯覺啫！睇番規格表，尾箱容量多達380公升，咪話放禮物，放個人都仲得，如果諗住燒嘢食，都夠位放晒所有物資。

冇Turbo Lag　易上手

除咗有型、實用，S60 2.0T仲畀到十足嘅駕駛樂趣。2.0公升直四Turbo嘅馬力及扭力，分別去到203hp及30.6kgm，配合六前速Powershift雙離合器波箱，0-100km/h加速只需7.9秒，極速235km/h，好力之餘，最抵讚係甚少Turbo Lag，力量傳出夠自然，就算新牌仔都易Handle。況且車架、懸掛，以至轉向系統都比上一代有所改良，就連懸掛彈簧長度都酌量縮短咗，攻彎更靈活利落。

精神差　City Safety自動煞停

佳節當前，大家當然想盡興，不過切勿忽略安全，尤其是駕駛一族。安全設計一向係富豪嘅最大賣點，S60 2.0T唔只「鋼水」十足，仲裝埋City Safety系統，當前方出現阻礙物、車速又低於35km/h，而駕駛者又冇反應嘅話，系統就會自行介入，以100%力度煞車，係專門針對慢車時駕駛者因集中力唔夠而造成嘅意外。

S60 2.0T設想周到，固然抵讚，駕駛者亦要有安全意識，千祈唔好酒後駕駛外，車廂嘅應節布置要適可而止，以免阻礙視野，亂咁擺，仲可能會觸犯交通條例。況且為咗疏導交通，呢兩日路面都會有特別安排，為免掃興，出發前最好去運輸署網頁（www.td.gov.hk/）睇清楚。