on.cc 東方互動主頁

激玩主題公園 Fing到陀陀擰

瑪利姬斯密士！大家今天的玩樂行程應該排得密麻麻，除了賞燈飾、食自助餐，最有節日氣氛當然是到主題公園玩餐飽。可以一嘗「Fing」到你暈的最新機動遊戲、欣賞40呎高聖誕樹之餘，仲有真人發聲報佳音，令節日氣氛推至最高峰！聖誕節是迎接新年、緬懷過往一年的好時機，大家亦可趁機與即將暫別港人的海洋館講聲「後會有期」，一舉兩得好開心！

聖誕節的街道逼滿人，不過就算要逼，都要揀個有聖誕氣氛的地方、與大班朋友逼爆！海洋公園今年就以「最激」來慶祝聖誕，公園早已準備閃閃發亮的聖誕布置、隨時出動的聖誕精靈製造氣氛，跟大家一起激住過聖誕，Let's go！

第1激:玩到甩帽洗衣機

聖誕要Happy，當然要大笑大叫癲一餐！膽大者就可以試吓園內最新機動遊戲─「翻天覆地」癲一癲。機動遊戲以極速搖擺鐵臂挑戰大家膽量及心臟負荷！「大圓錘」部分首先會前後擺動，讓大家享受微風，來個Warm Up；不過未幾就會無端升至半空，更開始作「洗衣機狀」自轉兼360度旋轉，人坐在圓錘上就如玩跳樓機般，離心力達瘋狂程度！玩到聖誕帽都飛脫，大叫Crazy！

第2激:人肉聖誕樹 Nicam報佳音

「Oh，Christmas Tree……」今日無論去到邊都會被聖誕歌疲勞轟炸，聽到也怕怕！無他，冰冷的機械聲總難以打動人心，如果是真人發聲就好得多，幸好公園內有「真人版」聖誕樹跟你報佳音！之唔係兩棵20呎高的「人肉聖誕樹」，上面共有幾十位小孩子，於節日期間，每日兩次大唱中英文聖誕歌；傍晚時分更會舉行亮燈儀式，40呎高超巨型聖誕樹及兩棵真人聖誕樹一同閃閃發光，漫天燈火，最啱情侶們駐足溫馨一番呢！

欣賞浪漫亮燈前，建議大家先到旁邊的「薑餅屋」熱吓身先！屋內有幾個搞鬼遊戲：在色彩繽紛的波波池內尋找聖誕精靈的寶藏、把聖誕願望掛於樹上、玩玩體驗拍照遊戲等。最吸引的當然是一屋都係薑餅人，勁多影相位，係咪龍友都一樣咁啱Shot！

第3激:笑聲告別海洋館

園內最多遊人停留的，相信是陪伴大家成長的海洋館。海洋館將於2011年1月2日完成歷史任務，取而代之是暫定於2011年初開幕的「夢幻水都」，而館內的海洋生物已陸續搬家往新居，2011年才與大家再見！而館內亦展出揚威國際的5歲天才小畫家劉見之多幅以動物為主題的畫作，大家若見到「盈盈」、「樂樂」狀物體在海洋館內出現，千萬不要被嚇窒，因為這只是天才小畫家的佳作呢！

2011新館率先睇

除了全新旗艦景點「夢幻水都」於2011年初與大家見面外，公園還會陸續引進多個景點，包括「熱帶雨林天地」和全新機動遊戲為主題的「動感天地」，分別於明年中及年底落成，新舊景點多多！要率先享有着數，大可購買全年入場證，因為由即日起至2011年1月26日，凡購買全年入場證，就可以獲贈$100園內餐飲和紀念品消費券，計落又慳番筆！