平治照明新技術
香港嘅路面照明系統都算充足，但夜晚揸車去到一啲鄉郊路段，例如沙頭角、飛鵝山一帶，都係漆黑一片，駕駛者要打醒12分精神，更何況係歐美嘅長途郊路，平治開發嘅「主動夜視輔助系統」（Active Night View Assist Plus），就可化解黑夜危機。雖然以往嘅Night View Assist都識得用夜視鏡頭及紅外線偵測，探測前方有冇行人出現，不過駕駛者需要將視線轉到中控台屏幕上；為免駕駛者分神，新系統就將頭燈紅外線偵測、夜視鏡頭、多功能鏡頭、聚光頭燈組、儀錶板顯示屏幕及頭燈控制晶片整合起嚟，當紅外線發現有人喺前方出現，頭燈就會投射一組光束，射喺行人身上，等駕駛者第一時間發現，行人亦直接知道有汽車駛近，令雙方盡早作出反應。為咗減少誤判嘅機會，廠方仲安排咗Speed Limit Assist及Lane Keeping Assist等技術輔助。安全設備永遠唔嫌多，希望廠方盡早應用新系統啦！