ldeaPad U260 調皮鎂女夠堅
Notebook來來去去鬥輕、鬥薄、鬥機能,你唔厭我都悶,於是Lenovo新推出嘅IdeaPad U260改玩用料。先用上鎂合金打造外殼,夠晒硬淨之餘,金啡配色仲好突出,成功搶Fo!打開機蓋後仲驚喜,鍵盤用上皮革圍邊,軟腍腍墊手打字一流;仲要連TouchPad都要大玩強化玻璃,平滑表面反應極快。最重要係18mm薄切機身都配備Core-i5處理器、4GB記憶體,機能夠撐!
講到Lenovo筆電,最為人熟悉嘅當然係ThinkPad系列,其實另一主線IdeaPad亦頻頻出新機,當中U系主打薄身、輕巧、時尚,而今次新推出嘅U260就完全係表表者,加上用料矜貴,年尾推出一樣咁注目。
皮革玻璃顯心思
皮褸、皮包大家就見得多,但有冇諗過皮革都可以加入Notebook?U260就大膽地於鍵盤四周圍上黑色皮革,起初小記聽見都擔心會跟金屬機身格格不入,但實情係兩者出奇地夾,而且厚身皮革仲包埋打字墊手位,軟腍腍承托夠晒舒服!玩完皮革腕墊,連個硬膠TouchPad都要幫佢加加料。驟眼睇同一般TouchPad冇大分別,其實已換上強化啞面玻璃,就算用力敲打都絲毫無損,最抵讚係TouchPad表面極度順滑,左拉右點反應超快,連兩指Multi-Touch嘅動作都感應得到,用落夠方便!
18mm金啡薄切
金屬外殼嘅Notebook,雖然硬淨又靚仔,不過大多數只得黑、銀兩色,冇嚟新意。備有鎂合金機面嘅U260今次就夠晒突破,採用罕見嘅金啡色機身,近睇仲有微微閃爍效果,夠晒貴氣。唔單止外表夠靚,鎂合金材料仲非常堅固,而且比一般金屬輕身,12.5吋嘅U260全機都只係18mm厚同重1.35kg,長時間拎出街都唔會話好攰,便攜性一流。不過要留意,U260未有配置DVDRW,安裝軟件或者重灌系統時,就要靠USB手指或外置光碟機喇!
杜比音效有驚喜
U260外形設計咁有心思,硬件當然唔會馬虎了事。配備Intel Core i5-470UM低電壓處理器以及4GB DDR記憶體,做Presentation、處理文書工作、睇網頁絕對冇問題。
不過只得內置顯示卡,所以打機效果可能差少少;好在試播高清片都流暢自如,無論喺12.5吋嘅高清屏幕或以HDMI輸出至LCD大電視,效果都一樣咁正!值得一提係機身內置的喇叭雖然體積細細,但音量十足兼支援杜比環迴音效,開到大大聲都唔拆,有驚喜!
12.5吋機身帶出Trip,尺寸啱啱好! $7,998
採用鎂合金機殼,金啡色特別得來又高貴。
部機設計咁有特色,等我都買番部先!(設計對白)
鍵盤四周都圍上軟腍腍皮革,用落好舒服!
TouchPad採用強化啞面玻璃,仲支援Multi-Touch,反應一流。
採用防潑水朱古力鍵盤,而且有輕微弧形設計,實用有心思。
拍埋張SD卡,就知道18mm機身有幾薄。
《Lenovo DirectShare》可以將文件、檔案同步至電腦,夠晒方便。
《Lenovo Security Suite》提供身份識別、資料保護等功能,保安更全面。
另有《VeriFace》面部偵測功能,有助加強保安。
播放測試
試播《The Tourist》,連Angelina Jolie嘅頭髮都清楚見到層次,效果不俗!
採用內置電池,只係用到4個鐘左右,續航力較低。
WEI獲得3.3分,跟同級電腦相比算係唔錯。
機身備有一組HDMI,方便接駁至LCD電視睇片。
全機只得兩組USB,坦白講,僅僅夠用。
內置嘅喇叭支援杜比音效,靚聲有保證。
屏幕備有高感光視像鏡頭。