得閒圍脖
Rowena：
細時好鍾意「斗記」一款煎蛋，後來至知佢叫「蠔餅」。不過好食嘅蠔餅太少，最大問題係市面嘅蠔餅啲蠔仔少到喊……於是我決心要做一塊屬於自己嘅蠔餅。有時做完啲飲食訪問後，就會私下向大廚請教蠔餅嘅做法。原來煎蠔餅除要落薯粉仲要落馬蹄粉、蠔仔飛水後要完全滴乾、煎時油要多落，以半煎炸嘅方式嚟煮就最好。經過10幾次失敗個案後，個餅雖未做到好好味，但至少食嘅人唔會因為蠔仔少而喊囉！
Sammie：
早幾日係細妹生日，一家人按照「傳統」去咗深水埗一間好味大牌檔食晚飯慶祝。今年姨丈竟然送咗一盒朱古力畀細妹做生日禮物，雖然全家人都揶揄他收到禮物後轉贈，不過，事實上佢係真金白銀買嘅。包裝精美嘅朱古力，上面有啲奇怪外國字，我仲取笑係泰國朱古力，姨丈更正說是中東朱古力，售價仲唔平添！晚飯後，細妹將朱古力拆開與我們分享，其中一包好特別，用玫瑰花瓣鋪成，一打開成陣玫瑰花味撲鼻而來，細妹試食後話味道不錯，比想像中好味，真係凡事都不可以睇表面！