VW Scirocco Cup 2010終極戰　賽車女郎仲搶鏡

以揭背辣跑形象，打動年輕車迷歡心嘅Volkswagen Scirocco，唔只喺公路上神采飛揚，甚至威盡賽車場！本年度嘅「大眾汽車中國賽車Scirocco Cup」，已經喺廣東國際賽車場完成咗第13及14回合，整項賽事亦圓滿結束，經過7個分站共14回合後，意大利車手安德烈亞（Andrea Reggiani）以總積分130分成為總冠軍，恨死唔少Scirocco粉絲啦！

於廣東國際賽車場舉行嘅最後兩回合賽事，安德烈亞喺首場比賽就以第2名過終點，提早攞到年度總冠軍，本港車手謝榮鍵及意大利車手蒙特西（Stefano Montesi），就分別以總積分116及105分，奪得年度總亞軍及季軍。雖然本港車手盧文康喺最後回合跑到第1，但係總積分未能超越蒙特西，以1分之差排喺「梗頸四」。頒獎禮上，Scirocco Cup亞洲區負責人沙德（Klaus-Dieter Schadewald）就咁講：「Scirocco Cup係一項具有德國血統及賽車文化嘅國際賽事，亦為中國賽車運動嘅普及起咗積極嘅推動作用。」

明年新增鈴鹿分站

今年報唔切名嘅Scirocco粉絲唔使失望，因為沙德話明年唔只照搞「大眾汽車中國賽車Scirocco Cup」，規模仲會擴大，除咗原來嘅珠海、內蒙鄂爾多斯、馬來西亞雪邦（Sepang）、北京及上海等分站，仲會新增日本鈴鹿（Suzuka）及新加坡分站，賽事安排喺5至12月進行，當中4個分站仲係國際頂級F1賽道。

沙德補充：「新增兩個海外分站，目的係令更多觀眾認識中國賽車運動，畀更多人了解Volkswagen嘅品牌價值及技術。我哋喺呢度（內地）舉辦Scirocco Cup，唔只要將歐洲成熟嘅賽車理念引入中國，仲要透過賽事培養優秀嘅中國本土車手，為佢哋提供國際化嘅學習及交流平台，推動中國賽車運動發展。」

事先張揚Tune大馬力

另一方面，廠方宣布下屆嘅賽車規格將會有所提升，2.0公升TSI引擎將會再作調校，馬力由200bhp增加至240bhp，傳動系統就沿用六前速DSG雙離合器波箱。此外，車身將會大量應用碳纖維物料，由擾流板、頭冚，以至車門及聚碳酸酯車窗，都經過輕量化處理，令賽車性能得到大幅提升。隨住本年度三強嘅誕生及2011年賽程揭曉，大會亦同時頒發「最佳技師團隊」、「年度攝影師」的「年度賽車女郎」大獎，為本年度賽事圓滿閉幕。至於明年的賽事安排及報名方法，相信2011年年頭就有分曉，Scirocco粉絲要密切留意。