《高達無雙3》連環爆最屈機

on.cc 東方互動主頁

鍾意玩機械人動作遊戲嘅朋友，呢個聖誕唔怕手痕，事關《高達無雙》系列作第三集聽日就出爐喇！為咗滿足大家揸高達嘅欲望，今集將會有史上最多機體參戰，而且最新《高達00》同埋《高達UC》中嘅主力角色都會悉數登場。粉絲們可以扮剎那爆「TransAM Mode」；又可以學獨角獸解除封印變瘋狂「Destory Mode」，最High都係可以將臨死機體掟向敵人玩連爆，夠晒屈機！

講起「無雙」兩個字，就知係一款畀幾百隻嘍囉圍攻、掣怒劈打到手軟嘅發洩專用Game！呢款《高達》同《無雙》Crossover嘅動作Game，於前年推出續集時作出大幅改良，成為一款中毒性極高嘅作品。到咗第三集，除咗保留以往爽快嘅玩法外，新增嘅「拍檔攻擊」同「誘爆」系統更令戰略變得多樣化，要單挑隻揪或者集體圍攻完全由大家話事！

參戰機體最多

今集絕對係「質」「量」大躍進！先講吓「質」方面，最令人眼前一亮嘅就係佢放棄咗以往寫實富質感嘅立體線條，反而利用賽璐珞着色法嚟描繪構圖，變得更貼近卡通畫風，感覺即時親切得多！至於「量」方面，包括最新《高達00》同《高達UC》，參戰作品數目多達14套，除咗大家勁想揸嘅00高達、獨角獸及新安洲外，就連大路卒龜霸同《高達G》嘅亡者兵都有得玩，要挑戰極限嘅朋友就一定要試吓自己身手喇。

霸地盤鬥戰力

穿梭戰場之間，一味狂劈實在太冇意思喇。今集保留舊有霸地盤同擊敗小首領嘅方程式，新加入「領域系統」令攻佔更富戰略性。例如用嚟「Call馬」嘅通訊設施、能增加拍檔計量表嘅前哨基地、仲有打尖移動嘅彈射器，只要成功壓制，致勝嘅籌碼就大得多。而「戰力計算」打破以前被擊敗就Game Over嘅慣例，敵我雙方都有戰力計，當敵方戰力計變0時，大佬先至「蒲頭」；反之如果我方戰力變成0，再被敵人KO先算輸，換句話說，只要留有戰力，大家咪可以無限復活！

誘爆怒屈甩身

今集嘅戰鬥方式增加咗好多趣味。首先就有個「誘爆」系統，當大家向敵人使出Charge攻擊或者SP攻擊，將敵人當「波」撞開之時，就能做到好似炸藥咁連鎖引爆，大片嘍囉即時陷入火海，簡直係屈機必備！另外，儲滿「拍檔計量表」後，可發動各式同伴效果，像《GVG》般給予支援攻擊；至於「緊急衝刺」就係當機體受傷時，會用噴射器回避再駁招反擊。如果網上連線玩，仲會好似外國嘅FPS Game一樣，打到冇力時靠同伴補血！咁多嘢玩，雖然行貨賣五百幾蚊都抵番晒！