改裝Alphard Bling爆MK

除咗Hip-hop界、潮流界，閃令令嘅Bling Bling美學亦都打入車壇。日本Parts名廠D.A.D最近就以豐田Alphard為對象，推出全套Bling Bling組件，由車身到車廂都變得華麗又潮氣，早前仲喺旺角街頭現身，想唔引人注意都幾難！

今次組裝示範嘅Alphard絕非山寨貨，車上所有Bling Bling Parts均出自日本原廠D.A.D，為咗隆重其事，D.A.D.兩位技術員仲由大阪遠道而來，監督整個組裝過程之餘，仲同筆者分享「變閃」心得。

淨計材料　$40多萬

今次所用嘅D.A.D產品，統統來自旺角一間汽車用品專門店代為訂購及組裝，車主不惜一擲千金，淨計材料、未計裝工，已經花咗$40幾萬。就以車身為例，換咗頭尾泵把之餘，頭燈同尾煞車燈都換埋LED，夜間行車夠晒閃，襯埋頭冚嘅羽毛形裝飾、四出式尾喉，閃石皇冠形水撥鉸位，都換晒閃令令嘅電鍍新Parts，夠晒姿整。

車廂布局　電鍍＋閃石

呢位鍾意Bling Bling文化嘅車迷仲未滿足，事關車廂改動更誇張。前座嘅多功能小木枱連杯架、中控台面板、波棍頭，連埋倒後鏡框，唔係電鍍就加咗閃石吊飾，閃爍指數拍得住美國Hip-hop歌手勁改嘅Rolls-Royce或Pick-up。除咗Sell個Look，車主都好注重乘坐感受，於是一併換埋Premium Lounge黑色皮椅套，上面縫咗D.A.D字樣嘅鈕扣及皇冠標誌，前排頭枕背後唔只有屏幕，仲對應無線耳筒，車主都幾識歎喎！

Fit日本車　6小時搞掂

今次遠道來港嘅D.A.D市場部總經理佐佐木貴（Takashi Sasaki），以及工程部主任鈴木義明（Yoshiaki Suzuki），負責監察整個組裝過程外，仲交流組裝心得。Sasaki生話日本同香港都係用右軚車，而且香港市場以日本車為主，所以毋須大動作改裝，已經用到D.A.D嘅Parts。就以今次嘅Alphard為例，除咗椅套，其餘Parts都好易裝，Suzuki生補充：「椅套有別於其他Parts，好多細位需要加工或即場剪裁，要Fit晒啲位，就要花多少少時間。」筆者就全程睇晒成個組裝過程，都係用咗6個鐘頭左右，真係幾快手。

由於日圓匯率需折算，故來港售價（未計裝工費）或有變動，詳情可向分銷商查詢。

查詢：2392 4244