日本直擊Eco Products 2010 Epson首推無毒白墨打印
各位去東京玩通常都係吃喝玩樂，但小記今次主要嘅行程，係早兩日先結束嘅東京「Eco Products 2010」環保產品展，Epson在會場展示出一系列以環保概念設計的產品，包括首部用上白色墨水的打印機，仲大力宣傳墨盒回收計劃及循環再造理念。
有去過日本嘅朋友，都會發覺佢哋好重視廢物分類同循環再造，好似垃圾桶就有分為膠樽、金屬罐、紙張及其他類別，至於打印機方面，就特別針對消耗量最高的墨盒，大力推廣相關的回收工作。
深入Epson總部見學
小記更深入Epson位於長野縣嘅多間廠房，參觀佢哋嘅分類中心、回收工場，更順道去埋Epson Museum同最新落成嘅Innovation Center，真係大開眼界。
環保新作 創意十足
當然Epson都有將環保元素注入新產品，好似今年喺日本上市嘅內置墨盒噴墨式打印機EC-01，以及使用全新白色墨水的大幅面打印機PX-W8000等，從墨水以至產品用料及能源消耗等幾方面着手，減少浪費。
夥5大廠 回收墨盒
業界龍頭Epson聯同其他5間公司喺兩年前開始，實行一個名為「Satogaeki Project」回收計劃，6間公司合力大搞墨盒回收再各自處理循環再用，喺「Eco Products 2010」展覽入面更設有多個回收箱收集用完嘅墨盒，仲有機會換到小禮物，鼓勵大家對地球先生好啲，為環保出一分力！
歡迎齊齊愛地球！（設計對白）
分類中心位於Mizube湖畔嘅分類中心，會將不同廠商及不同型號的墨盒及碳粉盒分門別類，然後再運送到其他地方進行處理。
Innovation Center今年中先落成嘅Epson Innovation Center，除咗用上自然通風系統等環保元素外，最特別嘅係由多個Epson投影機營造出嘅超巨型投射屏幕，畫面真嘅一樣。
白墨打印適用於軟性包裝紙等印刷品。
屏幕會顯示出每種顏色的墨盒用量。
佢就係Epson同其他5間打印機公司合作嘅墨盒回收箱。
就算是畫在牆上的產品簡介，都用上顏色不多的簡單圖像說明，貫徹盡量少用油墨的環保概念。
Epson董事酒井明彥先生更即場示範點用超短投影機EB-460i及按需要打印宣傳單張。
PX-W8000 首用白色墨水可打印到A1+尺寸的大幅面打印機PX-W8000，特別採用新開發的水性白墨水，方便打印在軟性的包裝紙上，無毒無害，又乾得快，更不需要使用加熱裝置，慳電之餘亦有效延長打印頭壽命。
EC-01 內置巨型墨水箱無墨盒設計嘅噴墨打印機EC-01，在機頂部分設有大型墨水箱，可經由廠方Refill形式補充墨水，最多可Refill兩次後先拎去循環再造，減省墨盒使用量。
整個上揭式機蓋都是墨水箱，可循環補給。
PX-203 自動雙面打印全白機身設計嘅相片打印機PX-203，內置雙面打印器，減少紙張的浪費；亦具備無線打印功能，相片打印成本甚低。
EP-803AW 無線平價打印具備無線打印功能的EP-803AW，採用簡單設計的LED操作介面，打印成本低，如打印一幅5R高質相片都唔使$2，相當經濟。
回收後的塑料除可製成原子筆、膠箱等成件外，連背後寫住「32」字樣嘅墨盒亦係Recycle產品。
曾在1998年隨太空人升空嘅「太空打印機」Stylus Color 800，機身包上銀色反光紙，以及在入紙和出紙口都加上固定裝置。
Epson Museum至於呢部放喺Epson Museum嘅EP-101迷你打印機，屬1968年出品，係Epson正名後嘅首批產品，勁有紀念價值。