得閒圍脖

Konnie：

繼電子版清明上河圖在港掀起熱潮後，剛過去的星期五、六及日，灣仔會展舉行的香港首屆「國際風水玄學展」也有清明上河圖展出，今次卻是「髮繡版」。那幅「髮繡版」上河圖長10米、闊28厘米，由大約60位刺繡師花了12年時間繡成，而頭髮則來自過百位不同民族少女的真髮，據講有誠心求神的意思。從藝術角度看，這幅圖的確價值相當高，但於風水玄學展中展出，個人認為有啲邪囉！

Seine Seine：

近日身邊友人情緒低落，飛回曾留學的地方，與闊別十多年的同學敍舊，結果十年人事幾番新，當日的陽光型男，經歷過離婚兼脫髮危機；往日校花已成囉唆的家庭主婦，令友人更慨嘆人生起跌，敍舊之旅反而令其情緒跌落谷底。像《Eat Pray Love》作者Elizabeth Gilbert的旅遊收穫，其實萬中無一，出書兼逢第二春，仲尋回自我。其實正確健康的旅遊態度，是以平常及好奇心經歷異鄉的人和事；所有東西都在預計之內，仲有乜好玩先？

Chiu：

曾經鍾意Jpop的窮樂迷，都有過如此的經歷：心裏暗罵將日本水貨CD標價勁貴的舖頭，但同時又死慳死抵，每當心愛歌手有新碟推出，例必乖乖奉獻。近10年Jpop的氣勢不復再，加上我年紀漸大，昔日買碟熱情近乎熄滅，但隱藏心底的傻勁，近日還是被觸動了，買了班霸之一Mr. Children的新大碟《Sense》。透過主音櫻井和壽的音樂，彷彿讓我再次體會到Jpop的美好。