《猛龍過江》全身像蝙蝠肌堅

堪稱現代武神嘅李小龍，雖然離世已經有37年，不過光芒從未減退，佢嘅武術、電影，甚至哲學，依然影響深遠。今年正係李小龍70冥壽，全球發起連串紀念活動，憑李小龍Figure打出名堂嘅Enterbay，亦炮製出《猛龍過江》全身像致敬，由金亨彥大師操刀，將武神魅力完美重生。

大師臨別之作

提起Enterbay，自然諗起李小龍，兩者幾乎畫上等號。今次嘅全身像就係旗下HD Masterpiece嘅第三款作品，跟過往兩款嘅戰鬥甫士唔同，今次取材自《猛龍過江》李小龍練功一幕，少有咁呈現出龍哥靜態一面。上身設計由金亨彥一手包辦，亦係大師蟬過別枝前嘅最後作品，絕對值得珍藏。喺金大師操刀下，完美展現出李小龍深入民心嘅鋼條形肌肉，就連兩脅下嘅「蝙蝠肌」亦清晰可見，配合逼真嘅皮膚塗裝技術，無懈可擊。

全球限量3,000個

由於今次用咗直立姿勢，所以上下半身嘅平衡至為關鍵，另一位大師YJ特別用咗電腦掃描技術，準確勾畫出下半身嘅應有比例，將兩位大師嘅心血力作，完美地連結起嚟。周邊Parts方面，跟上兩款相同，附送木製地台，仲刻埋龍哥簽名，配合45cm嘅高度，Display時更有氣勢。不得不提係今次嘅《猛龍過江》全身像全球限量3,000個，預計炒風難免，而且訂購者仲會送海報及布景板，所以真正「用家」都係早早落訂為妙，無謂益咗啲炒家吖！

同場加映《逃》大奸角

雖然《逃》已經完結，但戲中靚仔Michael及變態「茶包」T-bag，依然令人留下深刻印象。Enterbay就為《逃》重開引擎，第一炮係人氣變態佬T-bag，由頭雕到上色都由YJ一手包辦，有埋囚犯衫及花恤衫兩款造型，配合假手、刀仔、美金及「孖葉」等一推配件。至於第二炮Michael亦將會緊接推出，《逃》之粉絲要密切留意。

查詢︰2332 3615（Enterbay）