Panasonic GF2 女友2號索爆

on.cc 東方互動主頁

正所謂「兄弟如手足，女友如衣服」，閣下如果覺得對住屋企嘅「女友」對到厭嘅話，不妨換咗佢算吧喇！大家咪誤會，小記講緊嘅係有「女友2號」之稱嘅Panasonic Lumix DMC-GF2！佢比起1號瘦咗又多咗顏色揀，咁你話精明嘅龍友又點會唔識揀呢！

同樣係m4/3系統，眼見對手Olympus雖然每次都係小改，但話晒都推出咗四代，但自己部「女友」一啲都唔長進，又肥又重不特止，又冇限量版，一啲都唔矜貴。好在今次GF2無論機能同外形都有所突破，誓要喺聖誕前夕變身索女，仲唔大把人搶住要！

收身成功減磅7%

究竟點樣變身？首要重點梗係要減吓肥先啦！今次GF2唔止成功減磅瘦身，體積仲細咗足足19%，重量則輕咗7%，單拎幾耐都唔覺攰，而且握機手感好似攬住女友條纖腰咁舒服，配埋F2.5 14mm大光圈定焦餅鏡，用嚟玩自拍就最啱；加埋一次過出齊黑、白、銀、紅同粉紅，共5種機身色彩，熱情、純潔定冶艷嘅「女友」任君選擇，相信總有一款啱你口味！

iA智能更耍家

正所謂「美麗與智慧並重」，呢部GF2咁靚女，你都唔想佢淨係得個樣，用起來癡癡呆呆o架？所以今次Panasonic銳意強化GF2嘅iA功能，可以應用到相片同短片拍攝上，使用高變焦鏡頭時，會自動開啟OIS防震系統；到人像拍攝時又識得自動選用「人面辨識」對焦，確保人像拍攝時對焦準確無誤；仲可以長時間啟動「智能對比度控制」，令相片的曝光度更平衡，加上機頂右上方獨立設置嘅「iA」鍵，方便入門用家一按即用。

篤芒反應超快

除咗iA呢個Panasonic相機嘅招牌賣點外，大家唔好忘記輕觸屏幕亦係佢哋嘅主打。今次GF2都換上一個3吋輕觸屏幕，當選用「iA」同「我的色彩」模式時，更可點選全新嘅Touch Defocus功能，拉動屏幕下方嘅捲軸，就可以隨意調校散景效果，對於鍾意玩景深嘅朋友嚟講，可謂相當方便。各位還可以因應使用習慣利用Select and Drag功能自選Q.Menu內嘅調校設定，由於屏幕敏感度夠高，調校時相當爽手，篤芒對焦完全隨心所欲！