山口式魯邦三世瀛版難兄難弟

身手不凡、表情精靈，仲鬼咁鹹濕嘅怪盜魯邦，係唔少男生嘅偶像，最近海洋堂唔只幫佢出Figure，就連佢嘅老友次元大介都出埋，睇住呢對名副其實嘅日產難兄難弟摸住酒杯底，嗰個寫意款真係羨慕死人！

鬼馬表情大晒冷

一直專攻景品嘅《魯邦三世》，終於有Action Figure出場。動畫中嘅魯邦身手敏捷、飛天遁地，山口式Figure都做得到。除咗有Ball Joint及轉輪關節，膊頭嘅三角位仲整埋獨立Parts，擺跳躍甫士就更有動感。隨盒仲有四款面相造型，將魯邦喺劇中戚眉戚眼又伸脷嘅生鬼表情，一次過Show晒畀你睇。

至於老友次元大介，唔只槍法如神，佢銜住口煙、戴帽遮晒半邊面，挨近牆角避子彈嘅場面亦深入民心。山口式Figure唔只做齊佢把M19左輪及探長帽，就連槍戰特效配件、火機連專用手掌都落齊。

自編自導Set場景

今次嘅山口式魯邦Figure，筆者可以拍心口話，要玩就一定要買齊魯邦及大介至過癮！點解？呢Pair拍檔喺故事中成日誤中陷阱，但次次都大難不死，仲要笑料百出。呢兩款山口式Figure就分別跟咗好多場景配件，畀玩家Set場自編自導，例如可以放兩張摺椅，加張酒吧枱扮露天景；或者用隨盒磚牆，扮喺街頭避子彈。咁好玩，希望海洋堂快啲出埋峰不二子、石川五右衞門，以及錢形警部，咁就齊人喇！

累宮崎駿食三年白果

《魯邦三世》原先係1967年面世嘅一本日本漫畫，原作者係Monkey Punch，講述名盜後人魯邦三世、神槍手次元大介、美女間諜峰不二子，同埋日本劍客石川五右衞門，一門四傑一邊劫富濟貧，一邊逃避錢形警部，引爆連場笑彈，之後仲出埋TV版、戲場版及OVA等動畫版本，明年仲有機會上映真人版電影。至於1979年嘅電影版《魯邦三世—卡里奧斯特羅城》，正係宮崎駿首次操刀嘅動畫大片，原本大家都好高期望，但係衰在同《機動戰士高達》電視版撞期，當時日本食正科幻風，搞到魯邦電影版嘅票房只有預期三分一，仲連累宮崎駿喺後來三年食白果冇Job接。好彩宮崎駿冇放棄理想，後來先有《天空之城》、《龍貓》及《千與千尋》等大作面世。

查詢：2148 9483