姜文杰×姜麗文×黃湛熙唔睇$做音樂

當今樂壇猶如江湖武林，唱片公司分黨分派招兵買馬，而個體戶、「歌星仔」也每天寄望能加入某某門下，給包裝、出碟、開個唱，然後拍廣告再登台搵真銀。偏偏有些游離分子像黃湛熙、姜文杰（Benji）與姜麗文（Lesley）兩兄妹對唱片公司耍手擰頭，寧願零資源辛苦做屬於自己的音樂。

B：Benji　　L：Lesley　　H：黃湛熙　　Q：記者

Q1 ： 冇唱片公司金錢上支持，你們的音樂是怎樣做出來？

B ： 其實我們做碟的Budget好細，如果你唔當Manpower及創意都是Budget的話，整張碟都由我們兩兄妹一手一腳在家完成，逐條Track錄樂器、錄Vocal，連唱片封套都是自己在電腦裏設計和印刷，再親自將唱片送到唱片舖放上架。

H ： 唱片公司啲錢其實大部分只用在唱片的外殼，也只能製造到大碟嘅外表，入面嘅內涵就算你有千萬元Budget，都未必能夠做得好。

Q2 : 單打獨鬥的過程辛苦嗎？有冇人幫你們？

L : 最辛苦是要自己搞掂好多枝節嘢，要自己借衫、要Manage時間、連接Job都係要自己傾，有時覺得身份好尷尬。

B : 幸好有唔少朋友主動義務幫我哋，例如有朋友向公司請假，為咗幫我哋做保母車司機，又有朋友幫我哋安排Schedule和訪問。

H : 相比之下我需要顧慮的枝節就少得多，只是可能宣傳上差咁啲，但林一峰在這方面幫咗我好多，因為之前他曾幫我Featuring過幾首歌，相對令更多人接觸到我的音樂。

Q3 : 既然明知唔簽唱片公司就會冇資源，為何你們依然唔肯簽？

L : 我們最着重就是做音樂的自由，要做真正屬於自己的音樂！

B : 如果簽咗畀唱片公司，由他們出錢，自然講嘢都大聲啲，更會控制我們做出所謂「合乎市場」的音樂，我曾聽過有唱片公司高層說：「Melody同歌詞係點唔緊要，最重要有幾個超高音，難唱到極點！啲人就會覺得呢首係技巧之作，要在K房挑戰佢！人人爭住唱，咁就掂啦！」但那些是商品，不是我們自己的創作。

主流歌手 缺乏靈魂

Q4 : 點睇自己的音樂和主流歌手音樂的分別？

H : 正如Benji所講，主流歌手受着唱片公司的控制，他們唱的歌根本唔代表自己的思想，就算把聲有幾靚、技巧有幾高都冇用，根本就冇靈魂！但我嘅歌無論曲、詞都是發自內心，雖然未必係最好嘅歌，但起碼歌入面「有嘢」（內容、訊息）。

B : 好多人話依家啲歌手冇個稱得上係「星」，冇Charisma（魅力）又唔耀眼， 因為他們當中沒有自己的故事。在過去10年，尤其03年沙士之後，唱片業急速萎縮，唱片公司內真正做音樂的人都走晒，變成由一班生意人掌管；他們為了賺錢，就將歌手、甚至普通人包裝成為一個偶像，一件符合市場口味的產品。但這些偶像完全沒有個人風格，又如何顛倒眾生成為一顆耀眼的明星？Music does not lie！

Q5 : 對你們而言，這條獨立音樂路繼續行落去，行到哪裏才算是成功？

H : 我其實好憎教結他，也不喜歡做廣告音樂，因為我脾氣唔好，但為了搵錢做音樂甚至Support生計就惟有繼續教。所以當有一日可以靠我的音樂來搵食的時候，這就成功了。

B : 像我們的歌，那段旋律是上天送給我的禮物，我覺得很好聽便寫出來公諸同好，跟大家分享，僅此而已。

L : 不需要所有人認同我們的音樂才為之成功。

後記：最緊要啱聽

Benji說，他們曾被形容為「在主流中做獨立音樂」，阿熙則說自己是「在獨立中做主流」。其實所謂「主流」或「獨立」，界線只在於一個「錢」字，正如他們強調，音樂沒有對錯之分，只有啱聽與唔啱聽。而且也不認為凡是獨立製作的一定是好音樂，主流歌手的作品就一定沒有欣賞價值，當然作為聽眾的我們，也得打開耳朵接納更多聲音，給與各方更多機會，令香港的樂壇能夠走向真正大同。

創作靈魂之物

Lesley：

「我去到邊都會帶本筆記簿，有時搭車突然諗到一啲好靚嘅Rhyme或者歌詞就即刻寫低。不過之前有幾本筆記簿被冷氣機滴水滴到濕晒，好多記憶都冇晒，好傷心，我喊咗幾日！」

熙：

「電影《Once》 男女主角兩位演員本身係情侶，一向一齊搞音樂，就算最近分咗手都有合作。劇情講述男主角在受到繼承家族生意的壓力下，依然堅持靠音樂搵食。成套戲所有歌都超水準，Soundtrack本身已是一隻最佳唱片。」

Profile

Benji

秦沛之子，於加拿大修讀藝術系後回港，並於01年入行，在TVB擔任音樂節目主持。今年年頭與妹妹Lesley在《超級巨聲》踢館時一鳴驚人，最近與妹妹自資10萬元出碟《SHOWTIME》。

Lesley

秦沛女兒，於加拿大長大，曾於日本NHK電視台兒童節目擔任表演嘉賓，與哥哥合組Benji & Lesley共同創作大碟《SHOWTIME》，當中第一首主打歌《SHOWTIME》正是她17歲時的作品。

黃湛熙

1997年曾與友人組樂隊參加「嘉士伯流行音樂節」，之後作獨立發展，一個人拿着一支木結他創作，03年首次出碟，直至08年推出第二隻唱片《時光機》，今年再推出第三張大碟《Seventh of April》。