爽玩Windows Phone 7 Zoey心郁轉會
依家身邊朋友買親智能手機，唔係揀iPhone 4就係考慮改玩Android平台，好像忘記了Windows Phone！為重振聲威，微軟遂於今年底大打Windows Phone 7（WP7）反擊戰，不但將介面推倒重來，連操作亦一改以往歎慢板作風。日前LG及HTC已率先為WP7打頭陣，即找來陶喆緋聞女友岑潔儀（Zoey）試用新機HTC 7 Mozart，用後感一個字︰爽！
今次推出WP7系統，有分析員指係微軟搶回市場嘅最後機會。為此Microsoft亦出盡全力，找來Dell、HTC、LG及Samsung等大廠合作，預計年底前起碼會有9部新機面世，當中又以HTC最為積極，唔使一個月已有HD7及7 Mozart見街。
一體成形可換電
7 Mozart與HD7同期推出，風頭自然畀擁有4.3吋巨芒嘅HD7搶晒。不過論規格其實佢一啲都唔弱，同樣內建1GHz處理器、512MB ROM及576MB RAM，只係記憶體由16GB縮減至8GB，但操作反應同HD7一樣咁爽快利落！另一賣點係一體成形設計，整個機殼由鋁金屬切割而成，完全無縫，想入塵都難；而最細心係佢唔似設計相近嘅Nokia N8，機底竟然設有電池蓋可換電換SIM，Hang機都冇有怕！
變種HTC Sense
雖然HTC用開Sense介面，但由於WP7唔畀廠商更改公版樣式，因此用唔番。然而，HTC好取巧地提供咗一個叫「HTC Hub」嘅Live Tiles，內裏「分唇」跟Sense有9成似，例如有天氣預報、股市、計算機、單位轉換等，HTC更表示新工具陸續有來，等用戶Keep住有新鮮感。若嫌唔夠地道，微軟亦同步推出大量本地Apps，好似「電影速遞」及「行Guide」等，玩Apps唔差得過iPhone 4。
高清拍片兼執相
iPhone 4拍到720p高清短片，HTC 7 Mozart一樣有得玩，而且鏡頭像素高達800萬，配合頂級Xenon閃光燈，影像夠細緻之餘，補光效果亦更為出色。針對拍友，佢不但可一鍵進入拍攝模式，影完仲可以用新工具「Photo Enhancer」執圖，當中提供咗四邊暗角、負片、黑白及懷舊等14種特效，玩落勁似Lomo，連Zoey都玩到唔捨得放手！另外，值得一提的是，7 Mozart重量只有130g，為目前最輕WP7手機，更適合女仔使用。
WP7七大新功能
Windows Phone對上一次改革要數到去年的WM 6.5，但都只係將Today首頁稍為美化，操作依然沒有大改動！有見及此，WP7採用了一個全新核心，由介面到操作都截然不同，不單止新用戶，舊用戶亦要重新適應。以下為大家剖析WP7七大新功能︰
對應Xbox
新系統最大撒手鐧係與Xbox Live連動，用戶只要透過Games Hub，就能打到機、查閱積分、修改個人Avatar，甚至觀看線上朋友狀態等等。暫時已知有50款遊戲上架，例如人氣作品《The Sims 3》及《UNO HD》等，每款都有試玩版，背後更有完善收費系統，方便用家直接買Games。
磚塊介面
WP7最大分別，係首頁由以往嘅橫排顯示，變成一粒粒四方形磚塊，官方叫佢哋做「即時方塊（Live Tiles）」，一眼就睇到新聞、電郵、Facebook留言、天氣及相片等更新資訊，用戶更可自由組合磚頭位置及顏色，望落的確比舊介面吸引好多。
最強文書
Windows Phone一直以來最叻係文書處理，WP7亦唔例外，原生已內置《Office 2010》，毋須安裝第三方軟件，便能開啟及修改DOC、XLS及PPT等文件檔。新系統更新增了Outlook Mobile功能，讓用戶隨時隨地處理工作，比其他智能平台出色得多。
上網流暢
上代《IE Mobile 6.5》瀏覽器上網速度已大有改善，WP更預載《IE 9》瀏覽器，介面更簡潔之餘，對Multi-Touch亦有更完善的支援。奇怪的是，上代可透過Flash Lite睇到Flash，但WP7卻冇得玩，遇着Flash內容會整格留白，感覺有點倒退。
綜合交友
WP7內置了6大服務中心（Hub），用來管理不同功能。當中People Hub就為交友而設，除支援用戶的Windows Live帳戶外，還能整合Facebook、Google及Yahoo!帳戶，並透過「Over The Air」方式即時顯示朋友更新，毋須逐個帳戶檢查，方便直接。
自家搜尋
Android同iPhone都採用Google搜尋服務，WP7當然用番自家「Bing」搜尋引擎，用戶只要按下手機的「搜尋」鍵，就能直接跳至Bing搜尋器。另外，地圖亦改用Bing Map，而且只要登入Live帳戶，便能在地圖查看到手機位置。
改良同步
以往Windows Phone要跟電腦同步資料 ，操作較為麻煩，WP7就參考《iTunes》做法，將所有同步過程交畀《Zune Desktop》代辦。用戶不單可經此查看手機內容，更可過歌過相兼購買Apps，用慣iPhone的話相信不難適應。
專訪微軟︰Apps數目將達25萬
今時今日推出智能系統，要成功必須要有大量Apps支持先得。對此Microsoft商業及市場部總監Joelle Woo表示，目前WP7的開發工具包（SDK）下載量已達50萬次。估計將來會有25萬個Apps供應，可跟App Store匹敵。Jolle更指出，Microsoft正積極拉攏各地軟件商合作，以開發更地道的應用程式，以香港為例，暫時就有「漫娛」、「電影速遞」等，將來還會陸續增加。
同期WP7新機
搵食必備 LG Optimus 7
全港首部WP7手機，內置1GHz處理器及16GB記憶體，其500萬像素鏡頭更可拍攝720p高清短片及360°全景相，加埋7.2Mbps HSDPA及802.11n無線制式，規格極齊！手機更加入LG獨家Scan Search功能，用鏡頭掃一掃前方景物就能搵到附近興趣點，睇啱食肆更可直接Book位，方便！
巨芒大作 HTC HD7
HTC年度之作，搭載4.3吋巨芒已經夠晒誇張，厚度更只有11.2mm，巧奪天工！機身還內置雙喇叭，支援SRS環迴立體聲，播片時音量勁大；而拉開機背的隱藏支架更可橫放手機，翹埋雙手就睇到片，Free到震！
網友唱反調
WP7推出後，坊間評語大致都幾正面，不過有網友就唱反調，大彈佢有7大缺點，望落又的確唔抵幫︰
1.未支援Multi-Tasking。
2.只能改Live Tiles顏色，冇得轉換Wallpaper。
3.暫時只支援英文，輸入中文要靠第三方程式。
4.冇得Copy & Paste。
5.不能經藍芽傳送檔案。
6.瀏覽器看不到Flash。
7.抽起記憶卡插槽及視像鏡頭。
機檔案
制 式︰GSM四頻、WCDMA
作業系統︰Windows Phone 7
屏 幕︰3.7吋電容式，480×800解像度
鏡 頭︰800萬像素
記憶體︰內置8GB、512MB ROM/576MB RAM
對外連接︰藍芽2.1、USB 2.0、7.2Mbps HSDPA、Wi-Fi
通話時間︰405分鐘（2G）330分鐘（3G）
備用時間︰360小時（2G）435小時（3G）
體 積︰119×60.2×11.9mm
重 量︰130g
查詢︰（a）3520 1234、（b）3543 7777
