《Motion Sports》　屈膝扮滑雪勁攰

體感遊戲今年大熱，新Game仲浪接浪咁推出，好似Kinect呢隻《Motion Sports》就將雪山賽道、球場同馬術場搬到屋企，足不出戶都可以玩盡包括美式足球、滑雪同滑翔傘等多款運動遊戲，全方位挑戰運動細胞！

運動遊戲可以話係體感平台最正路嘅選擇之一，好似响新Kinect上，除有Microsoft推出自家《Kinect Sports》外，日本Hudson亦將會喺12月推出《Deca Sporta Freedom》，睇怕今次玩家又要玩出一身大汗。

6大運動 項目另類

至於由Ubisoft Milan開發嘅《Motion Sports》，就收錄咗幾款另類運動項目，6大主項中除了足球跟拳擊外，其餘滑雪、滑翔傘、美式足球以至馬術等4類運動，喺其他運動遊戲中都好難搵到。當中最容易上手嘅要算係足球同美式足球，全屬手板眼見工夫，比較特別嘅係踢波時嘅「九宮格」採用擲飛鏢式扣分制，一玩就識。玩家要由最基本任務開始，慢慢Unlock出唔同遊戲，總計有成40個迷你遊戲咁多，真係有排玩。

連環出拳 打到手軟

喺打到手軟嘅拳擊遊戲內，玩家與電腦角色對戰時要不斷使出直拳、勾拳去攻擊對手，而且到差不多擊倒對手時更要使出連環拳，玩完雙手都有啲痠痛。但最攰嘅都係滑雪，尤其係落山賽，要長時間維持住屈膝動作加速，身體亦要左搖右擺穿過指定旗杆，雖然比賽只得分零兩分鐘，但就攰到似行完十幾層樓梯。

精彩演出 網上分享

至於馬術就係最難控制嘅遊戲，要令到馬匹成功跳欄本身已係一大挑戰，但更難嘅係要控制馬匹轉向，有時死拉馬頭都轉唔到想要嘅方向，幾考大家耐性。辛辛苦苦挑戰完呢6項另類運動後，遊戲便會將玩家的照片Key在體育雜誌封面，透過遊戲內嘅TV Channel，仲可以將精彩演出放上網同其他玩家分享，所以當遊戲幫大家影相時，記得畀多啲笑容！

遊戲檔案

類型：運動

開發：Ubisoft

平台：Kinect for Xbox 360

推出日期：已推出

售價：$299

《Fighters Uncaged》批(月爭)膝撞樣樣齊

至於同期另一套Kinect遊戲《Fighters Uncaged》唔玩運動改玩搏擊，除咗出拳、閃身躲避同防禦外，遊戲仲可以做出批(月爭)、膝撞、Side Kick同Back Kick等70個武術動作，要手腳並用先搞得掂。不過唔一定要需有武術底子先玩到，好似出Back Kick時只需要一隻腳向後拉，然後再在地上畫個半圓即可出招，練多幾次一定識。

遊戲檔案

類型：格鬥

開發：Ubisoft

平台：Kinect for Xbox 360

推出日期：已推出

售價：$299

查詢：2418 8896