得閒圍脖

CMM：

與我同月生日的朋友實在太多，為免一個月食十餐生日飯，於是好友們決定舉辦11月之星生日派對，一次過慶祝晒。這次大家選擇到卡拉OK慶生，我們還遇到位窩心經理，先是送我們無限添飲，最後還幫11月的壽星拍照，再製成懷舊的水晶相座，Old School得來又有紀念價值，多謝Hello Wei（經理的真名）。

師傅仔：

鍾意一樣嘢，唔應該受年齡影響。好似我，細細個已經喜歡扭蛋，大個咗，仍然樂此不疲，每每見到扭蛋機即駐足，睇啱心水即時入散銀扭一扭。最鍾意扭機那一下，抽到甚麼反而不是重點，假如扭蛋是親朋、同事的心頭好，我會送出來，等大家一齊享受快樂。近期的新歡，是這些不同種類的蟹：大閘蟹、潮州凍蟹、麵包蟹等，細細隻算做得仔細，$5扭一隻，好抵！

S.man：

唔通真係關犯太歲事，抑或係「年紀大，機器壞」？一個月睇6次醫生：3次西醫、2次中醫、1次牙醫。不斷為醫生們奉上血汗錢，固然肉赤，但都不及食藥食到迷迷糊糊般辛苦，還要將烏卒卒、苦過DeeDee的苦茶灌入口，真係有苦自己知。為了令自己好過一點，特意找來一隻靚靚咖啡杯盛苦茶，還邊飲邊催眠自己：「呢杯Coffee好香濃喎，等我快啲飲晒佢先！」苦中作樂，咪就係我囉！