50吋投影 S11電話咁大

依家潮流乜都興「平板」，BenQ最近都出咗部號稱平板式微型投影攝錄機，小記初聽都大惑不解，但係見到實物後終於明白晒，原來佢嘅造型跟一部篤芒電話差不多，完全唔似傳統嘅手提DV機，而且機仔細細就可以影相、拍片，甚至當作50吋嘅手提投影機用都得，加上只係賣二千幾蚊，邊度搵？

講起呢類投影相機，記性好嘅朋友一定記得冇耐之前某大相機品牌也曾經推出過類似產品，不過唔同嘅係，BenQ DV S11以投影攝錄掛帥，透過跟機軟件，仲可以搖身一變成為一部流動影院，玩味性更高！

袋裝3.5吋篤芒

拎起部S11，長方形機身加上厚度唔夠16mm，唔講仲以為係一部手提電話。機身黑色部分用咗具科技感嘅金屬質地，配以香檳橙銀色邊框，加埋工整嘅橫紋，就算係塑膠用料都依然咁有金屬Feel，搶眼得嚟感覺亦頗高檔！S11搭載咗一個3.5吋超大「篤芒」，而且觸控靈感度高，畫面解像度都有23萬像素，亮度都有成300流明，屏幕尚算清楚，只係嫌佢白平衡唔太準確，時有影像偏藍的情況，不過大體上仍算不過不失。

圖示功能易上手

因為用咗芒設計，介面造得較為入門，但全部功能都設有圓形圖示，未用過DV嘅朋友都可以一玩就上手。S11叫得做手提DV，當然要隨時隨地拍片，此機除支援市面上熱門嘅1,080p Full HD外，仲內建咗10種拍攝模式方便影相同拍片，同時配備3秒預錄功能，拍片時影像並冇失焦情況，儲存速度又快，不過當拍攝環境稍為昏暗時，就容易出現雜訊，以致成像模糊。另外，S11亦具備500萬像素攝影鏡頭，小記試過以人像模式影Model，再將相片上載到電腦慢慢睇，發覺畫面仍有少許鬆散，有進步空間。

DLP投影更加靚

S11最巴閉好玩嘅莫過於佢個投影功能，佢內建咗LCoS投影鏡頭，使用單片式DLP取代傳統嘅三片式投影系統，令外置投影時畫質更佳。加上S11嘅投影範圍有成50吋咁大，仲可以使用機身上嘅旋鈕調校對焦點，或者以HDMI輸出接駁高清電視，啱晒聚會時跟一大班朋友即時分享，相當盞鬼！裝埋跟機軟件，更可即時變成一部流動影院，畀大家煲碟睇片。

機檔案

型　　號：BenQ DV S11

感　測　器：500萬像素，1/3.2吋CMOS

最大焦距：38mm（10倍數碼變焦）

最大光圈：F2.8

拍　　片：1,080全高清@30fps

拍片格式：MOV（H.264）

投影尺寸：5-50吋

顯　示　屏：3.5吋23萬像素觸控LCD

體　　積：108×55×16mm

重　　量：110g（不含電池及SD卡）

查詢：2330 6188