《Need For Speed Hot Pursuit》梁政珏揸超跑執法

已推出的新一集《Need For Speed Hot Pursuit》雖然無得揸法拉利，但遊戲發布會就搵來陳法拉做車手，以及着上一身制服預備揸警車嘅梁政珏。目的是想帶出今集交由Criterion Games開發嘅《NFS》，會回歸到昔日經典嘅警車追捕玩法，仲加入埋Autolog社交系統，隨時都可以知道有冇人破咗你紀錄！

千萬林寶變警車

遊戲剛推出，但熱潮早由Demo版帶起，兩星期內共錄得200萬次下載紀錄，而且在多個外地權威遊戲網站嘅評分亦係同系列中最高，足證改革成功。警車追捕超速車手嘅玩法雖然唔算新鮮，但當大家諗下可以揸住由超跑改裝成嘅警車，喺馬路上風馳電掣都幾過癮，好似揸住架由身價近千萬港元嘅Lamborghini Reventon改裝成嘅警車，在公路上追車已經好吸引。另外，遊戲內收錄嘅警車同跑車共有60幾架咁多，由Audi、Aston Martin、McLaren、Maserati到Porsche都有，就係爭咗法拉利，有點美中不足。

即時提示撩你挑機

遊戲操控一啲都唔複雜，只要記住油門、煞車同氮氣加速三個掣就夠，而且一切都以開得快、跑得喪為原則，唔使就住就住。今次警車追逐戰中，正邪雙方都可以開到近300米，要追近就要靠開氮氣Turbo加速，好在無論係逆線行車或甩尾都可儲氣，儲滿後按個掣就可短距離加速，勁爽。今集另一特別之處係加入Autolog社交功能，只要打機途中連線上網，就可以不斷睇住朋友喺遊戲內嘅戰績，如果有人唔覺意破咗你個紀錄，仲會即時提示你反擊，好有挑釁意味！

遊戲檔案

類型：賽車

開發：Criterion Games/Electronic Arts

平台：Xbox 360/PS3

售價：$329（Xbox 360）、$380（PS3）

查詢：3166 6001