紫龍帥Look初回次

紫龍帥Look初回次

長髮飄飄嘅紫龍,帥哥形象深入民心,早喺「銀河戰爭」同星矢生死戰時,人氣已經蓋過呢位第一主角,咁經典嘅靚仔Look,點會冇份變Figure!「聖衣神話」系列今年就主打初期青銅聖衣造型,星矢、阿舜同冰河之後,終於等到紫龍駕到,唔只有型,仲好識擺甫士!

擺甫士叻過神聖衣

雖然有人話呢款初期紫龍嘅面相,同原著有所出入,不過點都算係五官標致嘅帥哥,尤其跟足日本漫畫風嘅水汪汪眼神,筆者就覺得OK收貨喇。

如果你有買神聖衣版本嘅紫龍,更會覺得呢款初期造型好玩得多;雖然神聖衣夠華麗,組件又夠大堆頭,但係着上身太累贅,對手都提唔起,仲點出絕技廬山昇龍霸?相反初期造型夠簡潔,手腳活動唔會畀組件阻住,最抵讚係肩胛嘅連接位可以向上拉起,昇龍霸、百龍霸又或者聖劍手刀等必殺技,都可以輕易做到,紫龍粉絲可以放心入貨。

神話預告 冥王明年駕到

下個月會出埋神聖衣一輝,咁冥王哈迪斯又幾時出先?快喇,明年三月就會駕臨「聖衣神話」系列,而且唔係阿瞬嘅「鬼上身」版本,係冥王真身呀!全身披上黑鐵色嘅冥衣,喺強光照射仲會泛起銀光,而且所有細節都做得好仔細,哈迪斯之劍嘅劍身仲有刻紋,附盒包埋星矢被冥王刺中時嘅天馬座神聖衣胸甲,以及星矢口擘擘嘅面相組件,買咗神聖衣星矢嘅粉絲,都幾難走出冥王魔掌呢!
發售時間及售價仍屬暫定階段,一切依代理最後公布為準。

查詢:2433 1828(瑞華行)

鬥靚仔,我贏你九條街啦!

廬山百龍霸

聖劍手刀

廬山昇龍霸

聖衣神話天龍座紫龍(初期青銅聖衣)建議零售價:HK$400

肩胛連接位可以向上拉起,舉高手就唔會頂住啦!

除咗明眸Look,隨盒仲有盲俠面相畀你換。

聖衣神話冥王哈迪斯 發售日期:明年三月 售價:7,875日圓

冥王聖衣形態

隨盒有中劍嘅星矢面相及神聖衣天馬座胸甲,可重現星矢同冥王一決生死嘅場面。