投素！爭食激似羊腩煲

或者因為年紀大，每到秋冬時分，都好需要有暖嘢落肚，羊腩煲、煲仔飯、蛇羹……估唔到會喺銅鑼灣的「波羅密素食」食得到，而且像真度極高：煲仔飯打開有「鹹魚」香、「蛇肉」質感細緻，連埋一盅兩件，食素原來可以好滿足！

食素，早已不只是宗教理由，也可以為環保，為個人健康。坊間的素食餐廳近年愈開愈多，菜式也變得新派，試過就知芋頭魚、羅漢齋以外的世界其實好大。

煲仔飯鹹香四溢

食肉獸們，若怕素菜單調，來這裏一定會大開眼界。餐廳雖帶點傳統素菜館格局，但因老闆葉小姐不時與師傅度橋，所以出品多元化，幾乎網羅全球，像中式、日式、意式及東南亞等，讓大家有更多選擇。

近日見秋風起，這裏便有時令美食登場，全日供應。除向來受食客歡迎的合時煲仔飯、五菊素蛇羹，更有新出品─鑊仔枝竹羊腩、泰式明爐燒魚等，熱辣辣香噴噴，未食已經口水流。經小記一試，覺得鹹魚肉鬆臘腸梅菜煲仔飯最神奇，因發酵過的豆製品，竟散發陣陣梅香「鹹魚」味，食到底仲有飯焦，而羊腩煲亦係配料齊全，邊滾邊食夠氣氛！

點心新作芝心卷

以上菜式，能做出多種味道及質感，可說是靠大豆纖維及魔芋，前者爽滑、彈牙，後者因為晶瑩剔透，更能做出如「東坡肉」內的「肥肉」，又或者「臘腸」內的「肥肉粒」。餐廳方面主張健康飲食，煮法上少鹽少油少糖，並選購新鮮材料，除了向有信譽的素食製造商入貨外，亦愛自製素食及調製醬汁，食得健康。

食過暖身菜，趁今日星期日不妨亦試試這裏的一盅兩件，經常會轉換新款，新出品就有海皇釀冬菇、芝心牛肉卷、雜錦粟米餅及菩提馬拉糕等。其中，海皇釀冬菇內的冬菇釀了素肉餡料，香濃幼滑，而芝心牛肉卷炸得香脆，內藏「牛肉」及芝士，一咬開即有芝士流出，引發「芝」味。邊食邊飲杯滋潤的羅漢果桂圓茶，認真識歎！

查詢：2317 6908