Sooloos Control 15阿雪篤芒揀歌隨時Encore

透過電腦上網下載音樂後，直接以電腦喇叭聽歌固然方便，但播放音色麻麻，而且揀歌亦唔方便，Meridian最新推出的網絡音響Sooloos Control 15就全面解決以上問題，內置500GB硬碟，支援以失真率最低的FLAC格式儲存音樂，音色通透細膩。同時備有一個17吋指觸式屏幕，能因應歌手、專輯、曲目及唱片封套來揀歌，阿雪試過都話易睇易用，揀歌Encore都咁方便。

如果有留意開Meridian的發展，都應該記得上一代的Sooloos Control 10，基本功能與今次介紹的Control 15大同小異，最大分別是前者結構比較複雜，由Control 10控制台、Twinstore儲存及Source One集線系統三部分構成；反觀新一代的Control 15就將它們三合一，雖然硬碟容量由1TB減至500GB，亦刪除了資料備份功能，但售價亦由超過13萬元減至7萬多元，吸引力有增無減。

圖文並茂 清晰分明

為了方便用家儲存心水歌曲，Sooloos Control 15內置有500GB硬碟，因應音樂檔案格式，歌曲儲存量可達數萬首之多，為免用家揀歌時像大海撈針，此機便引進完善的揀歌系統，只需連接上網，就能下載大量唱片資料、歌手、音樂類型、專輯、曲目及封套圖片，甚至連樂評、歌手資訊及幕後班底都一應俱全次。這樣不單止省卻人手輸入的麻煩，更能在17吋屏幕上顯示歌曲的資料，用家只需輕觸屏幕就能輕鬆揀歌，歌手、專輯等基本資料固然一目了然，資深樂迷更能透過樂評或幕後班底來揀歌，聽歌之餘還可加深對相關音樂的認識，將享受推至另一層次。

音訊轉換 趕絕失真

一般音響初哥都偏愛以MP3格式來儲存音樂檔案，因為壓縮率高，每首歌都只不過幾MB容量，節省不少硬碟儲存空間之餘，經網絡下載或分享時都快捷得多，但缺點是會造成高低音細節的流失，令音色變得平板乏味。反觀Sooloos Control 15採用Exact Audio Copy讀碟技術，當音訊由CD傳送至硬碟時，資料會被檢查最少兩次，經過嚴格比對後，確保音色沒有失真，才轉換為FLAC格式儲存，無論在音色細膩感及高低音細節上都遠超MP3，質素媲美CD原音。用家還可透過同軸插口接駁擴音機，或以Speaker Link插口接駁該廠專屬喇叭，由於專屬喇叭本身已支援擴音功能，故不用再外接擴音機，接駁更為輕鬆簡潔。

機檔案

屏幕尺寸：17吋

解　像　度：1,280×1,024

硬　　碟：500GB

同　　軸：1組

體　　積：457×345×185mm

重　　量：10.75kg

查詢：2314 0811

阿雪wants to Share舞台劇演出超緊張

「早前參與了舞台劇《江戶無雙》的演出，雖然本身有拍電視劇經驗，但演舞台劇又是另一回事，既要熟讀台詞，還要記走位及感情投入，而且不像拍電視般可以NG，就算講錯對白走錯位，都要硬着頭皮演下去，所以起初真係超緊張，但舞台劇比較易入戲，滿足感亦較大，演完尾場那一刻，真係幾感動。」

I Eat：築地等食海膽刺身

「我本身喜歡食日本菜，天婦羅、壽司都愛食，但至愛還是海膽刺身。不少女生見到海膽刺身的賣相後就擰晒頭，但其實海膽那份甘甜味絕對是極品。我之前去日本旅遊時都不忘到築地品嘗海膽刺身，鮮中帶甜，還有淡淡的海水味，就算要排兩個小時隊先食到都值得。」

I Read：睇漫畫減壓

「平時工作壓力大，我最喜歡睇搞笑漫畫減壓，睇完笑完後真係開心晒，雖然身邊有不少朋友開始用iPad來睇漫畫，但我始終喜歡拿着漫畫書那份實在的感覺，公司知道我喜歡睇漫畫，所以每逢有甚麼動漫宣傳活動都找我來Cosplay一番，早前就扮過《涼宮春日》嘅角色，都幾好玩。」

I Go：奈良難忘睇鹿

「早前去日本玩，除了到築地食海膽刺身外，還去了奈良。奈良與京都很接近，感覺也很相似，睇古建築及大自然風景都好舒服，印象最難忘的是去了睇鹿，那些鹿完全不怕人，又靚又可愛，以後真係要搵多啲時間接觸大自然。」