史路比 60大壽
朋友Ceci响fb嘅Status寫住：「祝賀花生漫畫60大壽！」係喎，佢係Snoopy嘅忠實粉絲，我都要同佢慶祝一下，所以特登走去旺角一間專賣Snoopy精品嘅店舖逛逛，畀我搵到好多筍貨喎！
花生漫畫於1950年10月2日開始响報紙上連載，數數手指，今年Snoopy已經60周年喇，各地相繼推出紀念產品。旺角嘅「C. Gift Shop」最近都入咗唔少相關紀念品，類型多籮籮，包括家品擺設、月曆、Memo紙、Tee、手機繩等，真係由屋企、返工到行街都有Snoopy陪住。
負責人話：「我哋响日本等地入貨，客人有需要嘅話，可以向我哋訂購。以60周年為主題嘅貨品，部分係限量發售，如果客人唔及早訂貨嘅話，就可能要失望而回喇！同樣由於60周年嘅緣故，各地唔少品牌都同Snoopy嚟個Crossover，例如日本時裝品牌Pual ce cin就同Snoopy合作推出一系列服飾，我哋都有引入呢批產品，無論長短Tee都有，構圖好簡單，好啱秋天着。」
查詢：2332 8593
專家教醫「家庭病」
要維繫一個家，一啲都唔簡單，所以有時都要聽吓專家教路。最近逛書店，見到有本新書叫《家庭生病了》。乜家庭都會病咩？作者李維榕博士係國際著名家庭治療大師，佢認為家庭係個有生命嘅體制，同人一樣，會病、會痛、會摔跤。好多小毛病冇及時處理，就會變成腫瘤，响我哋最不察覺嘅時候，嚴重地破壞安寧。書中家庭故事均取材自真人真事，好有真實感，亦令我呢個爸爸大有啓發！
作者：李維榕 出版社：皇冠出版社 售價：$78
除咗食生日蛋糕外，都可以轉食曲奇餅，同Snoopy慶生！$229
60周年雲石擺設，有齊Snoopy同埋佢5個好朋友。$998
圓形瓷碟仔的骰又精緻，唔阻地方。$99
直接美國訂造嘅Lenox品牌瓷器公仔，一套5件，係漫畫書最早期造型，材料包括24K金製造，隨盒附上證明書，凸顯矜貴身價。$1,980
「開心遊百貨公司」A4文件夾$59
辦公室枱頭擺放Snoopy Memo紙，工作更添趣味。$79
2011年座枱月曆$149
原子筆及鉛芯筆，筆身有精美圖畫，用得又睇得。$169/支
A4文件夾$59
日本銀座特別用60個Snoopy嘅樣，設計成精緻嘅手機繩。$159/條
Pual ce cin跨科合作Charlie Brown棉衣。$1,380
60周年世界之旅小Tote Bag $399
Pual ce cin跨科合作白色長袖Tee $549