Tamashii金毛 提你儲定錢
原定今年12月先出嘅PG Strike Freedom Gundam，上個月尾已經有試版抵港，咁都未算誇張，Tamashii系列嘅2011年春季新品，早前仲齊齊嚟晒香港搞預覽，包括人氣持續高企嘅《超人迪加》、最新「拉打」《幪面超人000》，以及Robot魂嘅多款高達大軍外，就連四月先出嘅金毛獅王都大駕光臨，擺明提你儲定錢啦！
拍心口 收埋獅子腳
喺各大討論區人氣爆燈嘅《未來Robot 金毛獅王》終於「合金魂」化，呢套卡通1979年喺麗的電視熱播，成為唔少Kidult嘅集體回憶，不過一直好少商品化，依家終於皇天不負有心人！今次來港預展嘅金毛仲係試版，網上激烈討論嘅獅子前腿收起問題依然存在，不過Bandai拍心口話會解決問題，完成品時會收得埋，希望佢牙齒當金使！
超合金魂《未來Robot 金毛獅王》發售日期：明年四月 售 價：23,100日圓跟足動畫設定，由小型機械人、獅子及金霸機三者合體而成，與廿幾年前嘅初代超合金相比，梗係有天壤之別啦，被各大討論區評為明年必入Item！
試版對獅子腳仲未收得起，不過廠方話最後版本會做到唔使換件、完全變形。
暫定嘅武器有火炎劍、雷射劍、無敵箭以及金盾，唔知行貨有冇特製禮品呢？
SHF《000 Tatoba Combo》售價：3,150日圓最新拉打劇集嘅主角Tatoba（右）登場，配合初回特典「Anku」，重現劇中第一集嘅激烈戰鬥場面。另一位主角Gatakiriba（左）就喺三月接棒，售價一樣。
Deformed Meister Petit《One Piece》第2彈售價：每個約500日圓大受好評嘅《One Piece》Q版盒蛋公仔，將會加推第2彈，加入奈美及羅賓，仲有路飛嘅恩人紅帽子香克斯，一套九款另加一款特別版，抽唔抽得齊就睇你運氣喇！
Robot魂《重戰機 亞路加》售價：4,725日圓永野護嘅成名作《重戰機》，繼明年一月嘅亞路加Mark-Ⅱ後，前半部嘅主角機亞路加亦會喺2月入「魂」，雖然機仔細細，但係骨架用咗銅色設計，抵讚！
Robot魂《機動戰士 V高達》售價：3,780日圓今年初出過V2 Assult Buster Gundam，故事前半段嘅Victory Gundam終於都加入Robot魂行列，展現流線型身材外，仲改善埋機體嘅精密度，以及關節活動範圍。
Metal Build《00 Gundam》售價：14,490日圓質素超越G.F.F.Metal Composite嘅新系列，第一彈係1/100嘅00高達，可動部分使用Diecast，外裝就用硬質ABS，跟埋Seven Sword組件，仲有海老川先生特製台座，型！
Ultra Act《超人迪加》售價：3,570日圓屬於超人迪加嘅基本形態，即係「萬能型」啦，配搭多種部件，重現Hand Slash、超人防護牆及超人死光等絕招，初版仲送同比例嘅GUTS Wing1號機。
Ultra Act《炎魔戰士基利艾路人》售價：3,990日圓同步仲有迪加嘅宿敵基利艾路人，除咗有大量關節，身體上嘅白色骸骨圖案亦相當細緻，而且裝埋火炎特效組件，就可以擺出噴火形態，迪加粉絲點少得！