Thermaltake 最強電競武裝

電玩競賽（電競）响歐美等地甚至韓國、台灣同大陸都推廣咗一段時間，參賽者會組隊同其他地區嘅選手响會場對戰血拚，贏咗仲有獎金獎盃添！雖然香港未流行，但係近年多咗後生仔組隊出戰呢類國際盛事，而且同人打過先明白到咩叫做「工欲善其事，必先利其器」，所以想玩得叻，都要有強勁嘅裝備配合先得！

滑鼠精準度自己Tune

講起Thermaltake（Tt），好多DIY砌機發燒友都係佢嘅捧場客。因為廠商出開高階電腦機箱同CPU散熱扇，好多時都會用佢哋嘅產品來玩超頻。最近Tt响香港出咗一系列競賽裝備，好似呢款Laser Gaming Mouse BLACK，全機防滑皮革烤漆設計，拇指區又有防滑凹凸表面，唔怕打打下機跣手而慘被對手KO。另外，亦改用咗纖維連接線，大力扯都唔斷，加上插口經過鍍金處理，提升訊號靈敏度。最精彩的莫過於可以揭開底蓋，更換砝碼改變滑鼠重量，連解晰度都能根據需要從400至4,000 dpi自由調校，用Sniper瞄準敵人時，要幾精準都得啦！

鍵盤裝風扇吹手汗

到底一個賣成千蚊嘅專業打機鍵盤有乜嘢咁特別？好似呢款新返嘅Challenger Pro，雖然係薄膜式鍵盤，但就內置記憶體，可以畀大家記錄低4組，每組10個的Marco鍵，咁每隻Game都能設定專用Hotkey，勁！最犀利係鍵盤嘅左右兩端，竟然可以畀大家安裝風扇仔！有咩用？之唔係用嚟吹手汗！減低手汗造成嘅干擾，真係照顧周到！另一款MEKA G1機械式鍵盤，利用Cherry MX黑軸，無段式設計按下時非常暢順，仲支援5,000萬次按擊嘅超長壽命。

查詢：3173 6080