Pakho愛追焦 Mag玩濾鏡Nikon D7000大滿足

on.cc 東方互動主頁

全新的數碼單反D7000，具備全高清追焦拍片及1,620萬像素感光元件，成為Nikon中階系列相機的新成員，發布會上還請來熱愛攝影的周柏豪（Pakho）與林欣彤（Mag），Pakho話會用佢來幫好動嘅小貓拍攝全高清短片；而Mag就鍾意大玩數碼濾鏡功能，為相片增添個人風格，一部D7000就滿足晒二人的拍攝喜好。

自從無反光鏡（Mirrorless）相機出現之後，單反的地位已受到正面挑戰，就連中階機種的D7000都模仿D90的輕巧度，採用鎂合金來製作大部分機身，整體手感更佳，而且達到防潮及防塵功能，可抵擋春天潮濕的天氣，配合全新的CMOS感光元件，能更佳地展現影像的層次感，令細節一覽無遺。

追焦拍片唔怕走失

數碼相機可作全高清拍片已不是新鮮事，很多廣告製作都已使用單反取代攝錄機拍片，不過D7000就首次為全高清拍片加入主體追蹤功能，至啱好似Pakho呢啲喜歡使用相機拍片嘅用家。由於此機支援39個對焦點，不但影相時可選擇單點自動對焦，仲可以進行3D追蹤，唔再鎖死單一個對焦位，就算主角點郁都能拍攝到清晰相片。今次特別在連拍攝高清片都同樣應用得到，只要開啟全時間伺服自動對焦（AF-F）模式，鎖定主角後按下「ok」，相機就會自動進行主體追蹤，唔怕主角「走失」，用嚟影無時定嘅寵物或細路就最啱用。

雙插卡最高100連拍

D7000採用的EXPEED2影像處理器，高速連拍達到每秒6張，而且仲可以連續拍攝最多100張咁多，要捕捉動感十足的一刻絕無難度，最正是就算以RAW格式儲存都可以保持相同的連拍速度，返到屋企執相時就更方便。因應分秒必爭嘅動態拍攝，相機還提供了雙記憶插卡設計，除了可以將JPEG及RAW格式的相片，分開儲存到兩張記憶卡外，記憶卡內的相片和影片還可以互相複製，例如可從A卡挑選需要後製的相片儲存到B卡，唔使換卡都可以騰出更多空間供相機拍攝之用。

創意濾鏡提升玩味

相對而言，攝影器材的規格並不是女生買機的重點，她們反而講求拍攝靈活性和相片特效，好似Mag就好欣賞D7000的夜攝功能，皆因在使用最高ISO 25600感光度下，拍攝出來的相片雜訊仍然較筆者預期中理想，唔怕冇用腳架影夜景時影到鬆郁矇。另外，Mag亦喜歡利用相機的數碼濾鏡功能，為相片加入特效，除了原有的星光、色彩強調等濾鏡外，還新增了近期大熱的魚眼、色彩輪廓、彩色素描及模型效果，可以在睇相時預覽及另存不同效果的相片，加入更多個人風格，提升玩味。