潮！飛髮古物店

貪靚嘅我諗住去恤個靚髮，咁就畀我發現一間集髮型屋同古董精品於一身嘅特色舖。嘩！真係洗濕咗個頭都仲可以Shopping，啱晒我呢啲行街精！

走入呢間主力打造古董風嘅髮型屋「Neo Classic + Open Sesame」，視覺就一直受到衝擊。包圍住你嘅無論係燈飾、吊扇、鳥籠，以至身旁一排排木箱、行李篋，又或者飾物、擺設，都令人感覺如時光倒流。同髮廊店主Gigi同Jimmy傾咗陣，先知道原來呢間舖前身係兩間獨立嘅前後舖，今年7月份先响灣仔現址、一座戰前唐樓合體。Gigi同Jimmy都係古董迷，店內嘅古董精品都係由世界各地搜集返嚟，由20年代至70、80年代嘅全古董精品都有，亦有設計師利用古董再設計嘅精品同仿古董製品，雖然年代唔同，併埋一齊又出奇地啱Feel，估唔到剪頭髮都有Surprise，今日真係好日子！

查詢：2367 5613

叻生:Topshot看香港

自從早排買咗單反相機，對影相就達到欲罷不能嘅地步，逢有影展都會去學吓嘢！今次呢個攝影展由素有「空中攝影大師」嘅法國攝影師恩亞祖貝特抗操刀，而攝影作品就係佢首次飛越香港上空多個地方，從空中角度捕捉香港迷人嘅俯瞰照片，當中包括維多利亞港、青馬大橋、西九龍、舊啟德機場、葵涌貨櫃碼頭等具代表性景點或地標建築，畀全球大眾一個欣賞香港美景嘅機會。個展覽咁精彩，等我帶埋叻仔去，培養佢影相嘅興趣先！

《空中看地球》

日期：即日至12月26日

時間：10:00am至10:00pm

地點：奧海城2期露天廣場

費用：免費

查詢：2740 4108

叻太:襪切留意

天氣轉冷，我走在時代尖「啄」，當然要即刻出動，今次目標係款式百變嘅潮「襪」。本來以為要走訪港九新界，先可以搵到心水，點知咁好彩撞到一田由即日至11月9日，舉行20周年《一田Socks Paradise潮襪大賞頭》活動，一次過引入超過1,000款潮襪、長襪、短襪同Leggings，花多眼亂。我已經用迅雷不及掩耳嘅速度買咗花柄、dot柄、Lace花紋、Bling Bling閃石同今季日本大熱嘅毛毛系列潮襪，成個冬季可以大玩Mix and Match，真係諗起都興奮呀！

查詢：2694 1111

叻仔:輕鬆學Idioms！

近年好鍾意睇外國電視劇集，不過好多英文Idioms都唔係好明，如果聽得明嘅話，唔止煲劇過癮啲，就算同外國朋友溝通都好啲！响外國讀書嘅同事Carson，介紹我睇新出嘅工具書《Idioms in Action Through Pictures 輕鬆學慣用語》，裏面用淺白嘅敍述文字同例句，加上幽默風趣嘅漫畫，生動介紹最新90條常用英語Idioms，聽講呢本書近期好受學生歡迎，所謂活到老學到老，我都要買番本先！

《Idioms in Action Through Pictures 輕鬆學慣用語》

作者：Rosalind Fergusson　定價：$56