Enjoy！一店四景　Hazel Hea足一日

或者是忙碌惹禍，小記見識過不少宅男、宅女─放工放假只想躲在家裏盡情攤抖。新8模兼Octobeez成員徐熙素（Hazel）則選擇到上環的新餐廳Oolaa，這間佔地多達6,000平方呎的巨型食店，集露天茶座、酒吧、餐廳於一身，可以飲咖啡上網、Happy Hour，然後晚飯飲嘢直落，Hea足一日。「足不出戶」，看來也可以這樣解釋……

初看Oolaa位於必列者士街，即暗忖「邊度嚟o架？」原來只是在史丹頓街的盡頭，再行前些少便到。餐廳自成一國，卻又跟與蘇豪、蘭桂坊為鄰，可算是旺中帶靜。

多元餐飲概念

中上環舖租貴，餐廳有幾千呎已經少見，何況像這「巨無霸」橫放路旁，更覺矚目；近路邊的門窗還可完全打開，變成Sidewalk Cafe，連同路旁的樹木林蔭，即散發異國風情。Oolaa所屬的飲食集團，其實在中環也有不少餐廳，今次選址這裏原來是：「我們想將不同概念的東西，放到同一個地方，像這裏集合了咖啡店、酒吧、餐廳及露天位置，在中環找不到這麼大的地舖。」

餐廳長長方方，容易布置，還有梯級貫穿全店，店方表示可用來舉行派對、活動，甚至舉行Fashion Show都得。餐廳幾合一的設計概念，Hazel自言好鍾意：「放假嗰陣都好想Hea，盡情抖唔想郁。如果嚟呢度，就有齊咖啡店、酒吧同餐廳，想約朋友飲嘢傾偈，或者同男朋友晚飯撐枱腳都得，玩足全日唔使轉場。」

結合中西元素

環境好Hea，但餐廳出品卻絕對不「Hea」。入門即見薄餅焗爐，火光熊熊，等一陣就有自家製薄餅食，大廚團隊有如「聯合國」，但個個經驗豐富，可爆發更多創意靈感。食材方面，亦是經過精挑細選，多數來自澳洲、新西蘭等，像牛、羊、海鮮及奶類製品等。

為迎合多國籍客人，餐廳便將西餐加點Asian Touch，像燒吞拿魚內有麵豉醬及黑芝麻，醬汁亦加了日式芥末，和風十足，而大蝦沙律則帶點泰國風。據說客人對中西合璧的美食很受落，當中包括了來試食的Hazel，這愛食海鮮的女生說：「餐廳的菜式其實幾傳統，像燒吞拿魚，不過換了做法即有新鮮感。但凡海鮮我都鍾意，最緊要用料靚、夠新鮮就得；而燒羊架則嫩滑多汁，同香料配搭得好好。」

徐熙素近況：

拍戲、推出新歌《暴走Nana》之後，現繼續學唱歌、跳舞、做DJ及打泰拳等，爭取更多演出機會。

查詢：2803 2083