鬼聲鬼氣iPhone Apps

萬聖節愈嚟愈商業化，專為Halloween而出嘅商品亦愈嚟愈多，上iPhone嘅App Store一睇，好多萬聖節特別版Apps都上晒排行榜。無論係想為自己換個萬聖節鬼怪Look又好，播啲應節鬼聲或鬼音樂又好，甚至只係想輕輕鬆鬆玩吓搞鬼新Game都好，一於趁呢幾日一齊去搞鬼！

《Angry Birds Halloween》

下載費用：0.99美元（折約7.7港元）

《Angry Birds》係隻玩極都唔厭嘅Game，仲不斷有新關畀大家Download，花幾蚊玩到咁耐真係抵。原版《Angry Birds》已經大結局咗，廠方就趁住萬聖節前出隻特別版《Angry Birds Halloween》，換過晒好似《怪誕城之夜》嘅場景，綠色豬戴嘅頭盔就變成南瓜，好鬼可愛；而且仲有成四十五關畀你玩，算係幾有良心！

《Coin Dozer Halloween》

下載費用：免費

可能之前大家都有玩過曲奇版推銀仔，今次開發商就應節地推出萬聖節版《Coin Dozer Halloween》。推銀仔方法照舊，但場景變咗，加上可蒐集嘅道具由原來嘅哨子、鑽戒變成應節嘅南瓜燈籠、幽靈同女巫道具等，玩落都幾有氣氛！

《Zombie Shock》

下載費用：1.99美元

受歡迎嘅打喪屍遊戲仲有一隻《Zombie Shock》，玩法唔係以第一身形式開發，而係用上橫向動作模式，設計上都幾有美式風格。如果想喪打喪屍或者其他妖魔鬼怪，呢隻Game都幾啱大家，遊戲收錄咗多達五十個關卡畀你打，有排玩。

《N.Y. Zombies》

下載費用：0.99美元

想玩恐怖啲嘅應節Game，以FPS形式設計嘅《N.Y. Zombies》就幾啱大家胃口。雖然要在iPhone上開發FPS遊戲有先天性限制，但《N.Y. Zombies》已算做得唔錯，可以換到多款武器打喪屍，而且都幾血腥添！

《Talking Halloween Pumpkin Free》

下載費用：免費

成個App都只係得個南瓜頭，但只要大家對住佢講嘢，南瓜頭就會記低大家所講嘅嘢，然後以低沉同恐怖嘅聲音翻讀，最多可記得晒多達十段錄音，趁萬聖節嚇吓啲朋友都好。

《Top 100 Songs for Halloween》

下載費用：免費

《Top 100 Songs for Halloween》幾啱大家開Halloween Party時播嚟聽，當中收錄咗一百首關於萬聖節嘅恐怖歌或者刺耳的Sound Effect，當中更包括有Michael Jackson嘅《Thriller》，聽完覺得啱仲可以上App Store買埋添。

《iMut8r》

下載費用：0.99美元

為應節化個恐怖Halloween Party妝一啲都唔平，但只要裝上呢個《iMut8r》App後，就可以用iPhone影低個人或朋友嘅靚相，然後用手指點選各種恐怖特效，要變成魔鬼、人狼、喪屍、女巫、殭屍話都無咁易。變臉後可Save落iPhone Library之外，仲可Upload上Facebook同朋友分享。

《ReFace Halloween》

下載費用：0.99美元

《Reface Halloween》同樣係幫大家虛擬地執個Halloween Party Look，但唔似《iMut8r》咁玩緊電影化妝，《Reface Halloween》更似幫大家執個省鏡靚樣去Party嘅感覺，驚嚇程度唔大，Share上Facebook就更有驚艷嘅感覺。