PS Move體感新Game 開Party爭住玩
香港機迷其實都幾幸福，好似上星期剛剛正式登陸日本的PlayStation Move體感遊戲平台，香港早在9月15日已經全球率先有得賣，比日本玩家早咗成個月有多！而且仲有唔少男女生都啱玩嘅體感遊戲，想喪跳喪Fing、扮揸槍射擊、抑或跟遊戲主角玩互動Mini Game都得，最啱萬聖節開Party齊齊玩。
PS Move 操控變化多
PS Move是專為PlayStation 3而設的體感遊戲操作系統，透過PS Eye鏡頭感應由Motion Controller所發出的動作來操控遊戲，部分遊戲更需配合內置有Analog掣的Navigation Controller，或用兩支Motion Controller操作。PS Move遊戲共分為兩大類，其一是專為PS Move而設的專用遊戲，必需使用Motion Controller操作；另一類是所謂PS Move對應遊戲，除可使用原來的無線六軸手掣操作外，還能支援Motion Controller操作，例如玩類似《Time Crisis Razing Storm》這類槍Game，使用Move控制器就更有Feel。
接駁PlayStation Move系統後，只需要利用一支Motion Controller左Fing右Fing，就可取代傳統手掣的操控方法，操作簡單，感應力強，除咗傳統男性玩家必玩嘅動作同射擊遊戲外，仲吸納到一班嫌傳統操作過分複雜嘅女性玩家，玩起上嚟，分分鐘打得贏有十幾年機齡嘅男性機迷添！
運動類
在體感遊戲平台推出運動Game，其實都幾順理成章，現時已推出的PS Move運動遊戲，除了有SCE自家出品的《Sport Champions》外，亦有由Ubisoft推出的《Racket Sports》，要打機Keep Fit，話都無咁易。至於男生抑或女生啱玩？呢個問題都幾難答，但點計在體力上都係以男性玩家比較佔優。
《Sport Champions》
類型:運動
開發:SCE
售價:$298
《Sport Champions》可玩的運動類別有好多，更可對應兩個Motion Controller操作，例如玩劍擊遊戲時可以一手拎住盾牌，一手揮劍狂劈；玩射箭遊戲時又可模仿取箭及拉弓動作，全部都做得好真實。
《Racket Sports》
類型:運動
開發:Ubisoft
售價:$298
睇見個名都估到呢隻Move遊戲係以球拍類運動為主，在遊戲入面可以打到網球、壁球、羽毛球以至沙灘排球，鍾意玩球類運動的玩家就啱晒！
射擊動作類
射擊遊戲跟動作遊戲都係男性玩家的強項，不過當射擊遊戲搬上PS Move平台後就變成了槍Game，可以將Motion Controller安裝在另購的槍形控掣器上，玩起上來就更好Feel！
《Time Crisis Razing Storm》 PS Move專用
類型:射擊
開發:Namco Bandai Games
售價:$999
《Time Crisis Razing Storm》係隨同首輪PS Move推出的射擊遊戲，而且一次過收錄咗包括《Time Crisis 4》在內的3套射擊遊戲，將Motion Controller接上槍形操控器就可瞄準同發射，速度上都做得幾唔錯，玩落幾有街機Feel！但不設獨立發售，需要購買連控制器的$999遊戲套裝先有得玩。
《Kung Fu Rider》 PS Move專用
類型:動作
開發:SCE
售價:$298
《Kung Fu Rider》係最受注目的首輪動作遊戲，特別之處在於遊戲用上仿香港街景設計，男女主角在香港街道上坐住Office凳周圍轆，利用Motion Controller向上下左右郁動來避開障礙物鬥快到終點，幾有趣味。
其他類型
一般的智力遊戲或寵物育成遊戲，手部郁動冇咁多，可以Hea住Fing，都幾啱女仔玩，雖然男仔都玩得，但相信唔會有太多男仔，鍾意拎住支Motion Controller幫寵物沖涼同玩遊戲吧？
《EyePet Move Edition》 PS Move專用
類型:育成
開發:SCE
售價:$298
去年推出的寵物育成遊戲《EyePet》極受女性用家歡迎，但始終要使用指令卡或者在紙上畫公仔，玩法唔算方便。新版本《EyePet Move Edition》就係專為PS Move而設，全程可以用支Motion Controller操控，簡單直接，如將Motion Controller變身成花灑幫可愛竉物沖涼，或噴出番梘泡同佢玩，隨時Fing足一日都唔嫌悶。
《TV SuperStars》 PS Move專用
類型:益智
開發:SCE
售價:$298
電視綜藝節目就睇得多，咁有冇諗過自己親身上陣呢？《TV SuperStars》就可以畀玩家一嘗當明星的滋味，除了一些簡單的體力動作遊戲外，亦加入唔少甚有趣味的迷你遊戲，男女電視迷都啱玩。
查詢：2341 2356
不日新作
其實唔止得《GT5》延期，不少PS Move專用或對應遊戲都未能如期推出，其中包括《無限回廊~光與影之箱》等等，查實現成遊戲都有排煲，唔爭在等多一陣！
《Killzone 3》
PS Move對應
期待度：★★★★★
類型:射擊
開發:SCE
推出日期:2011年
預期出年2月推出的《Killzone 3》就首度支援PS Move，唔知用Motion Controller扮槍準繩度夠唔夠高呢？不過打唔掂用番手掣都仲得。
《Socom 4： U.S. Navy SEALs》
PS Move對應
期待度：★★★★
類型:射擊
開發:SCE
推出日期:11月
另一套對應PS Move體感平台的射擊遊戲，講來頭應該冇《Killzone 3》咁大，但遊戲提供多達14個單人關卡以及可支援多達32人的多人模式，約埋成班老死拎住Motion Controller開戰都幾爽。
《LittleBigPlanet 2》
PS Move專用
期待度：★★★★★
類型:動作
開發:SCE
推出日期:11月
第一集《LittleBigPlanet》大受家庭玩家歡迎，尤其係女性玩家更好鍾意啲布公仔主角，第二集就可以用埋Motion Controller幫助解謎，唔使怕搞唔掂複雜嘅手掣操作。
《無限回廊~光與影之箱》
PS Move專用
期待度：★★★★★
類型:益智
開發:SCE
推出日期:12月
有冇發覺PS Move Motion Controller都有啲似電筒？呢套遊戲就確實將Motion Controller當作電筒使用，透過照出陰影幫主人翁搵路走，玩法簡單但都幾考腦筋。
