香港地揸車，高油價避無可避，求政府出手、叫油商咪加咁盡？嘥氣啦，自求多福好過。除咗出車揀啲慳油型號外，其實多啲留意日常嘅駕駛習慣，都可以慳番唔少油錢，以下介紹嘅「慳招五招」就絕對幫到手！

慳招1：切忌大腳油

起步嗰陣大腳踩油門起圍，當正自己係車手咁款，威唔威就見仁見智，不過一定好食油，若然每盞燈位都咁做，一缸油好快玩完。揸車實際啲好，如果唔係特別趕時間嘅話，起步不妨輕腳啲，或者以扭力較大嘅低波起步；加速就盡早將低波轉高波，慳唔少油o架！

慳招2：Check車胎氣壓

車胎氣壓唔適中，唔只影響行車安全，仲會造成無謂耗油，事關車胎氣壓太小，會增加車胎與地面嘅摩擦，變相令汽車需要更多油去推進；氣壓太大就會令行車唔穩定，影響安全。記住車胎行得走得冇穿窿係唔夠o架，應該依照車主手冊，打入適量胎氣，仲要定時定候去油站或者車房檢查氣壓，咁就安全又慳油啦！順帶一提，有車主鍾意換大輪圈寸數，睇落好似型啲，不過咁做都會增加耗油，換軨前要三思。

慳招3：高速咪開窗

開冷氣會增加耗油量，呢點大家都知，不過呢排開始轉涼，北風增強，唔通次次揸車都要熄冷氣？其實如果天氣唔算太熱，不妨考慮喺車廂加裝風扇仔，唔少的士司機大哥都係咁做，夠涼之餘又唔使開冷氣，慳油又環保。你可能會諗，唔開冷氣、唔用風扇，開窗都得啫？睇情況啦，因為開住窗高速行車，會增加唔少氣流阻力，變相增加引擎負荷，分分鐘因小失大，用多咗油都唔知。

慳招4：引擎Fit用油自然少

耗油量多少，同引擎狀態好壞有直接關係，如果引擎長期都保持喺最佳狀態，對慳油有好大幫助，所以車主唔好偷懶，要定時檢查機油，以及油隔及風隔，有唔妥就要盡快維修、更換為佳！

慳招5：車廂要常清

做車主已經負擔多多，又何苦將啲重擔擺晒落部車身上……唔明？我係話唔好放咁多雜物喺車尾廂呀！除咗藥箱及後備胎呢啲應急裝備外，盡可能唔好長時間放太多嘢上車，米缸就話要「常滿」，尾箱就可免則免，部車負重少咗、引擎少啲負擔，行車都爽啲、慳油啲啦！

細食代表Jazz

1.3容積嘅日本車仔大行其道，除咗夠實用、車價平，而且勝在「細食」，好似本田（Honda）Jazz Trio Passion，用咗1.3公升直四i-VTEC引擎配五前速加減波箱，一般行車狀態，2,000rpm就夠，平均耗油量只係5.4L/100km，計落每km唔使$1，年終幫你慳番唔少油錢啦！

車檔案

車　　型：五門五座位揭背車

引　　擎：直四i-VTEC

容　　積：1,339c.c.

最大馬力：100ps/6,000rpm

最大扭力：13.0kgm/4,800rpm

驅　　動：前置引擎、前輪驅動

傳　　動：五前速自動波連加減波

懸　　掛：（前）麥花臣 （後）扭力桿

制　　動：（前）透氣碟 （後）實心碟

售　　價：$169,880

查　　詢：2380 2231（合群汽車）