以二次大戰作為題材嘅遊戲多不勝數，所以打足11年二戰嘅《Medal of Honor》系列都搞搞新意思，新一集《Medal of Honor》就轉打現代戰爭，將戰場搬到經常在電視上見到嘅阿富汗，仲請埋多位美軍特種部隊特勤人員提供意見，令遊戲內嘅戰場更加逼真！

美軍精英 奉命反恐

玩二次世界大戰遊戲時，因為年代久遠，共鳴感始終爭啲，但今集《Medal of Honor》就將戰場搬到阿富汗，電視上成日播住有幾多平民被殺，或者有幾多美軍陣亡，玩落感覺更加埋身。今集遊戲講玩家要扮演受命於國家指揮局嘅一級特種部隊成員（Tier 1 Operators），喺200萬名美軍中只有幾百人能夠入伍，可以話係美軍中嘅精英部隊，派到阿富汗戰場上執行只許成功不許失敗嘅反恐軍事任務。

三支部隊 四種角色

喺單人模式中，玩家可以親自控制海豹部隊、三角洲部隊以至美國遊騎兵三個單位，總計扮演四個不同角色參與這場軍事行動，包括從地面配合戰鬥直升機攻入敵軍大本營，或者深入敵陣指示戰機轟炸，亦可化身戰鬥直升機機師，在半空掃射地面嘅敵方部隊，今集仲加插好多近距離埋身戰鬥，玩得更刺激過癮。

場景配樂 現場一樣

雖然電視畫面上嘅阿富汗全係一片片荒蕪嘅沙漠，但遊戲入面除咗有風塵僕僕嘅沙漠戰場外，亦有河谷、雪山同簡陋嘅城市戰場，加上扣人心弦嘅配樂，好有置身阿富汗現場嘅感覺。當然戰鬥場面係《Medal of Honor》嘅主線，打得好、殺得多仲會得到好多英勇勳章，但遊戲除咗展現戰場嘅驚險狀況外，亦會透過角色間嘅支援同扶持，表現出軍人之間嘅情誼。

遊戲規格

類　　型：射擊

開　　發：EA LA、EA DICE

平　　台：Xbox 360、PS3、PC

標　準　版：$329（Xbox 360）、$380（PS3）、$300（PC）

戰　士　版：$349（Xbox 360）、$399（PS3）、$320（PC）

推出日期：10月12日

查詢：3166 6001