早陣子韓國「iPhone女」熱爆網絡，人人拎幾部手機玩Music App扮巨聲，之後連郎朗都上台表演iPad彈琴絕技，人氣一時無兩。咪以為學佢哋玩鋼琴、換套鼓、彈埋結他實會好貴，事關iPhone大部分樂器App都係免費下載，夾Band合奏仲扮得似模似樣，就算唔熟音樂都好，亦可跟住指示學按Chord和彈歌仔，難怪這些Music App長期佔據App Store排行榜頭幾位。

Drum Meister Lite 手指當鼓棍

想做潮爆Rock女，就一定唔可以錯過《Drum Meister》，佢同專業Drum Set一樣有多達10個鼓件，由底鼓、軍鼓到小鼓等全部有齊，只需用兩隻手指就可當鼓棍咁打，仲可任意調校鼓件位置令你打得更就手。而Lite版可加入5個Beats及錄低Drum Solo樂章，完全版甚至可換鼓和加入更多Beats。

下載費用：免費

Finger Piano Lite 迷你版鋼琴

買部鋼琴隨時要二至三萬銀，用《Finger Piano》Lite版就唔使錢都可彈出美妙樂章，雖然iPhone個芒咁細彈得唔順手，但最過癮係附有練習模式，可像《Beatmania》跟住節奏指示咁彈，如果嫌Lite版得十首歌左右太少的話，仲可玩Free Play自由創作歌曲，到唔夠喉才升級完全版。

下載費用：免費

TouchChords 虛擬結他弦

夾Band當然唔少得結他手，利用《TouchChords》便可將iPhone變成結他臂，按於適當弦線位置或掃Chord時，便會發出不同音調，遇到唔識彈的樂曲時，仲可進入tab2.0叫手機示範埋手指擺位同教埋你點按，新版更加入Music Store讓用家購買流行歌曲譜。

下載費用：免費

NLog Free Synth 混音最Pro

《NLog Free Synth》免費版無論按鈕和設計都與專業混音琴鍵接近，甚至能調校Pitch、XY、Filter等，另附有96首Sound Bank夠晒Pro，只不過完全版多了模組編輯和Multi-effect等功能。連韓國人氣iPhone女金耀熙都用佢配合《BeatMaker》演唱Lady GaGa名曲，就知有幾好用。

下載費用：免費

其他音樂App

Rap住扮DJ捽碟

落Disco成日見人捽碟鬼咁型，其實iPhone一樣可利用《Baby Scratch》扮捽碟機，在黑膠碟上下捽就會發出類似DJ-mixing般刮盤聲，又有埋音量、拍子和Loop按鈕，還能將自己的聲音錄埋入去，想做DJ潮人又怎可錯過？

下載費用：免費

卡拉OK跟住唱

由於iPhone嘅本土音樂App並唔多，想唱吓廣東新歌都幾難，幸好台灣《KKBOX》有晒香港人氣歌曲，就算最新Hit歌都可串流試聽，仲連埋歌詞畀你跟住唱，當做卡拉OK都掂。只不過免費版得30秒，要登記成為會員才可足本重溫。

下載費用：免費

樂壇天后Madonna

唔單止一眾粉絲和潮人迷上iPhone，不少著名歌手都有推出新App谷人氣，就連Madonna都推出官方App，除備有娜姐音樂專輯和最新消息外，仲有齊YouTube試片、多款靚相和相關書籍等，更可到討論區留言。

下載費用：免費