貼紙相質素又差又起格，點解女生們仍然爭住玩？相信箇中原因無非係可以亂畫一通，畫花面貓又得，加個皇冠心心亦得，一班Friend齊齊逼入鏡勁有氣氛！無奈係貼紙相機已愈來愈少見，想玩貼紙相，依家惟有靠日系手機。好似新出P-06B影得之餘，仲畫得寫得，加埋防水功能，水底都影到貼紙相！

新出的P-06B最大賣點係Touch Screen操控，雖然屏幕只有3.1吋兼得26萬色，但在電阻式背板下，用跟機Stylus篤芒反應卻出奇地流暢；無論一般操作、SMS或影相，輕輕一篤就做到，感覺比電容式屏幕更實在。

翻芒座枱 粉紅必搶

日系機不嬲玩包裝，除了Touch Screen，P-06B還一改Panasonic以往的手機設計，雖然表面仍然係揭蓋，但屏幕就首次能夠180度向後翻，摺埋後座枱擺放，睇片篤芒都好就手。另外，Pan記機向來非黑即白，今次P-06B保留以上兩色外，還提供粉紅色，女生必搶！跟今季其他日系機一樣，佢亦支援IPX5/IPX7級防水功能，即可在常溫1米水深下，正常運作30分鐘，潛住水都可以「咕嚕咕嚕」咁傾電話！

僅1.1秒 極速起動

P-06B另一強項係鏡頭像素高達1,320萬，即係每張相解像度足有3,120×4,160，用嚟曬海報都綽綽有餘。至於其他規格如27mm廣角、ISO 12800超高感光度、一笑即拍及6倍數碼變焦都未算特別，最正係鏡頭起動時間僅需1.1秒，見啱景物就可以影，包冇走漏眼！制式方面，此機對應GSM四頻及3G，但由於圈外問題，要硬解先用到，所以3G模式下只可撥出不能接聽電話，3香港SIM卡亦用唔到，其他台則完全冇問題。

試畀你睇

日系機「花臣」零舍多，篤芒防水只係P-06B冰山一角嘅功能，想知道佢仲有咩嘢玩，就等小記試畀你睇。

落雨防水

因為係Sample機關係，小記冇將部機浸落水測試，但防水濺一定冇問題，而且充電位有防水膠邊保護，即使落大雨都冇入水。

一笑即拍

人臉對焦呢個分唇日系機一早有，P-06B更進一步玩埋一笑即拍，模特兒嘴角一揚就會自動按下快門，保證張張相都笑容滿臉。

自製貼紙

影完相可在相片上任畫任寫，除畫筆、圖形等繪畫工具以外，仲有大量Kawaii圖案畀你揀。玩家更可以加入另一張相，大玩相疊相效果。

手寫月曆

好多人鍾意係月曆上塗鴉，P-06B就有個「Handwriting Diary」功能，容許用家係手機月曆上寫入任何記事、圖案及相片。

按掣縮圖

屏幕係電阻式，睇相自然冇得Multi-Touch，所以縮放要靠「*」、「#」兩個掣，略嫌不便。

計步消脂

內置計步器，可計算每天步程所消耗的卡路里及脂肪數量，至啱女仔Keep Fit用。

Mini Game

雖然P-06B冇得裝App，好彩內置咗《pop'nmusic》同《Zoo Keeper》等mini game，搭車等人都有得玩唔使悶。

難入中文

手機支援篤芒，但奇怪係竟然冇得手寫輸入SMS，而且入中文要靠50音，係最大缺點。

功能目前最齊

今季日系機都係主打防水及影相分唇，P-06B在這兩方面都有出色表現，加上貼紙相、手寫月曆等玩法，功能為目前最齊。傳聞Panasonic會在秋季推出1,400萬像素新機，絕對令人期待！

機檔案

制　　式︰GSM四頻、WCDMA

內置屏幕︰3.1吋26萬色TFT，480×854解像度

鏡　　頭︰1,320萬像素CMOS

記　憶　體︰內置210MB，支援microSDHC記憶卡（最高16GB）

對外連接︰藍芽2.0、USB 2.0、7.2Mbps HSDPA

通話時間︰230分鐘（GSM）、190分鐘（3G）

備用時間︰240小時（GSM）、540小時（3G）

體　　積︰114×51×19.9mm

重　　量︰148g