中秋節玩燈籠、食月餅，又點少得狗狗份兒！原來狗狗月餅同人食的一樣，有冰皮又有傳統款式，而且仲可以D.I.Y.！今次小記請來寵愛軒導師Coco為大家示範一下自製薯仔三文魚口味月餅，易整又實際，而且仲好有營養添！今個中秋，一於整多幾個，實行人狗一齊賞月，不亦樂乎啊！
今次由寵愛軒導師Coco負責示範的薯仔三文魚月餅，分別有冰皮和傳統兩款口味，兩款都健康有益，當中薯仔有澱粉質可補充體力，三文魚則有Omega 3能強化心臟健康，不過月餅雖然味美，各位主人也不要「大量生產」，避免狗狗吃過量。Coco說：「大狗如金毛尋回犬，一日食一個傳統口味月餅已很足夠，中狗如迷你牧羊、曲架則只適宜食半個；至於細狗如芝娃娃、松鼠狗，牠們的Quota更只是四分之一個呢！若當正餐吃的話，同一餐最好配搭一些蔬菜，方可促進狗狗的腸胃健康，唔怕食滯！」
冰皮口味 透心涼
各位主人製作冰皮月餅，緊記要選無糖冰皮粉，不要添加任何調味料，而製造月餅的工具、食材全都在一般的蛋糕材料店有售，以下的材料分量可製作六個傳統Size的月餅，咁就可以一次過請埋啲狗友齊齊食啦！
步驟:
1. 首先將薯仔和三文魚蒸熟，除了這兩款材料外，大家還可因應狗狗的口味而選擇雞肉、牛肉，又或秋季當造的紫心番薯，但切忌加入調味料。
2. 將已煮熟的薯仔壓成薯蓉，並加入熟三文魚拌勻。
3. 將水慢慢倒入無糖冰皮粉中，緊記每次要逐少倒，直至足夠揉成粉糰為止；如感到粉糰太濕可加粉、太乾則可加水。
4. 灑少許冰皮粉在桌上，然後以麵棍將冰皮粉糰壓成冰皮。
5. 將餡料搓成球狀，再將之包入冰皮內，切記餡料不要太多，避免影響製成品賣相。
6. 將少許冰皮粉灑在月餅模內，再將冰皮球擠入月餅壓模內壓實，並慢慢脫模，便可製成靚靚冰皮月餅！
導師Tips！
「人食的冰皮月餅要冷藏，但狗狗吃的就唔一定要冷凍，不過雪凍後月餅的外形會靚一點，但狗狗進食前就要先置於室溫『過冷河』，否則易肚痛！」
傳統款式 夠經典
傳統月餅的製法跟冰皮月餅大同小異，不過前者以低筋麵粉代替冰皮粉，以及於製成月餅外形後，還需要掃上蛋黃漿及焗烘才告完成。
1. 當月餅脫模後已成雛形，這時候可以掃上蛋黃漿，製成品才會有金黃色的視效。
2. 用牙籤在月餅面的四角，以及中心篤幾個小洞，讓月餅在焗爐內有疏氣空間，避免月餅發脹後變形
3. 放入焗爐以攝氏180度焗約半小時，大功告成！
「冰皮、傳統月餅」製作班
第一次自製狗狗月餅的朋友，可先上一個月餅D.I.Y.班，掌握技巧後回家大作戰！
日期：9月18日及19日
時間：7:00pm-9:00pm
堂數：1堂，共2小時
名額：5-8人
費用：$280（包材料）
查詢：2381 8500
同場加映：現購月餅一樣掂！
始終煮食講天分，如自問是手藝欠佳的主人，倒不如購買現成的寵物月餅。Dog One Life自製的傳統寵物月餅，口味包括紫心番薯×鴨肉、南瓜×雞肉、馬鈴薯×吞拿魚及龍脷柳×甘筍蓉共4種口味，但主人要注意，月餅只接受預訂，記得早啲打電話啦！
查詢：3105 5550