好多人都知石硤尾有一間玻璃坊教人吹製玻璃，原來佢哋最近仲開設咗專門店，售賣玻璃藝術品擺設，亦有實用嘅家品同埋首飾，今勻可以把玻璃藝術帶返屋企喇！

呢間專門店剛於上星期六（28/8）先開業，老闆係玻璃坊嘅創辦人兼玻璃藝術家黃國忠，佢一向致力推廣玻璃藝術，今次開店當然亦想把呢門藝術帶畀大家。

黃國忠嘅新作：企鵝，形態簡約，有啲人覺得似企鵝，有啲人又覺得似標點符號頓號，幾有幻想空間，據講另一對同系作品依家身在蒙古展覽。

以鑄造技術製作，玻璃裏面的色彩跟氣泡睇似自然而成，其實係經過創作者嘅精心設計，呈現玻璃嘅液態跟通透感，係黃國忠嘅作品。

店內除咗售賣老闆嘅作品，仲有好多本地藝術家嘅創作，可以話係唯一一間本地原創玻璃藝術品專門店，叻太幾時都咁支持本地創作，當然要「十卜」啦！

環保係熱門題材，玻璃當然都可以循環再造啦！利用玻璃遇熱變形嘅特性，拉長、壓扁，點都得，睇吓呢Set汽水樽改造成嘅作品就知喇！	色彩豐富嘅花瓶，插花又得，當作擺設一樣咁靚。未定價。	室內設計師馮寶儀從家中5隻貓咪取得無限創作靈感，愛貓之人一定好鍾意。電話繩$85/條，耳環$75/對，貓咪紙鎮$165。

此店一方面有高雅獨特嘅玻璃藝術擺設，另一方面就係平民化嘅玻璃家品跟飾物，鍾意收藏藝術品嘅知音人，當然可以嚟呢度買到好嘢；平時少接觸玻璃藝術嘅朋友，可以嚟呢度學吓欣賞玻璃藝術品，好似我咁有購物欲嘅，都可以買到心頭好，一於將玻璃藝術帶返屋企！

螺旋狀嘅頸鏈跟耳環，出自藝術家王茵茵之手。頸鏈$1,200，耳環$80。

Snappy Mushroom系列皮繩頸鏈$180/條，耳環$100/對。