好似大哥話齋，揸車要瞻前顧後，要做到呢一點，一定要好好利用車上嗰幾塊倒後鏡，揀啱款式又調校得當，可以拉闊後方視野，盲點愈少、睇得愈清，意外發生機會自然愈低，為人為己都要認真看待啦！

學車嗰陣，師傅已經成日講，無論開車或者Cut線前，都要擰頭望後，以及望清楚倒後鏡，你仲記唔記得先？其實每次換咗倒後鏡，甚至開車前，都要調好倒後鏡嘅角度。

中置鏡不能偏差

開車前除咗校好Seat位，更加緊要係檢查中置倒後鏡，以及門邊鏡嘅視線角度，中置鏡要睇到全個尾窗，唔係偏左或偏右，至於門邊鏡要睇清左右情況，校到鏡下方嘅角位見到少少車身就OK。

B柱位特別難睇

校好倒後鏡唔代表萬物一失，事關仲有「盲點位」，就係隔籬線嘅汽車駛到近B柱位置時，由於折射角度問題而喺鏡面消失（大約係司機位右方約45°、左方約60°），其實已經駛近身邊，如果你唔察覺而Cut線嘅話，你話幾危險！要解決問題，最佳方法係轉線時先打燈，再回頭望一望，確定隔籬線冇車，先慢慢扭軚Cut線，小心駛得萬年「車」呀！

好習慣增視野

裝飾應免則免

唔少車主鍾意掛飾物喺倒後鏡，或者喺玻璃貼貼紙，甚至喺車頭車尾玻璃放滿公仔，咁做都會大大影響後方視野，為安全計，可免則免，公仔都係留番擺屋企啦！

長髮要紮起

如果你係長髮族，揸車又鍾意開窗，記住要紮起頭髮，以免被風吹亂髮絲，影響儀容事小、遮擋眼睛事大。