Angelamamy：

近年香港興起台食熱潮，凡是鬧市旺區，總有不少台飲店、刨冰室，不過質素參差，品質也沒保證。令人驚喜的，反而是一次北上的台食經驗，食品出自內地有數家分店的「鹿港小鎮」，不但菜式充滿地道台灣風味，就連刨冰飲品也一樣出色，其中牛奶珍珠冰更是令人吃不停口，其奶味香濃、珍珠煙韌帶有黑糖味，製作認真，絕對值得香港台食店效法。

金枝：

自問不是瘋狂漫畫迷，但有兩套漫畫卻是由細睇到大，其中一套是《金田一少年之事件簿》。上星期經過報攤見佢出咗新書，當然即時買啦！但唔知係我聰明咗定係今次故事確實有點「流」，我睇咗一半已經估到兇手係邊個，所以冇乜心機追，斷斷續續用咗成個星期先睇完。真懷念作者之前的巔峰之作《露西亞人偶殺人事件》，用奶茶面層的薄膜包住安眠藥避過耳目，咁都畀佢諗到，令我讚嘆不已！

S.man：

有個當日本導遊的哥哥，我覺得自己無比幸福，因為經常都吃到新鮮空運自東瀛的美食。由多年前的Hit爆手信─白の戀人朱古力餅、雞泡魚乾，到早兩年人人爭住買返香港慢慢歎嘅長腳蟹、巨型帶子，我都比人吃得快食得多。今年，向來主張健康飲食的哥哥專攻生果，其中果肉軟腍腍的夕張蜜瓜，香甜又多汁，不過最令我流口水的，仲係來自山梨縣的白桃，嘩！嗰陣香噴噴嘅桃味，真係要試過先知有幾正！