仲有個幾禮拜暑假就結束，大家好應該响暑假完結之前盡地一鋪玩盡啲！講到玩，炎炎夏日有咩好玩得過約埋班Friend出海喪玩？若嫌淨係游水曬太陽冇新意，咁超激嘅炮彈飛人你又夠唔夠膽玩？

坊間唔少遊艇公司專門提供租船出海服務，通常船上都配備一兩款水上玩意畀大家玩，惟十次有九次都只係香蕉船搭Wakeboard，略嫌驚喜不足。但今次的船主添哥就特別配備多款刺激水上玩意，包括：炮彈飛人、神奇飛氈及「攞命」梳化床等，包保個個排隊爭住玩。

新穎玩意 轉到你暈

眾多玩意中，要數至激至好玩的莫過於炮彈飛人。大家在玩之前需先穿上差不多有1.2米長的充氣背心，玩嘅時候，上半身就要好似龜仙人咁「縮」响背心內（可避免喪飲海水），然後雙手拉緊游繩並任由快艇拖拉，便可像炮彈飛人咁喺水上極速飛行。當快艇轉彎時，「炮彈」橫飛，然後不停喺水中360°轉完又轉，十足人肉炮彈一樣，轉到你感覺先High後暈。

四人同玩 水上梳化

另外，一次過可供4人同玩的「攞命」梳化床亦相當過癮。唔好睇呢張梳化床比屋企張床褥大同厚就好似好穩陣，玩落你就知佢有幾激。玩時大家可選擇趴、坐、跪，甚至瞓喺度，當快艇極速拖行然後不停轉向，梳化床會隨着方向轉變，在水上左片右片，上面的人則會左搖右擺。尤其是置身左右兩邊的玩家，這個時候應該會感到快撐不下去及快要被丟出去的感覺。當力度最盡時，無論你點出力抓緊扶手，結果都係連人帶床齊齊翻落水。

超薄飛氈 左Fing右Fing

至於隨時會Fing到你翻轉的神奇飛氈，就可算係多款充氣玩意中最「薄」嘅一款，頂多4吋厚，每次最多可供3人同玩。玩的時候只需俯臥其上，雙手握緊設於氈邊的扶手，只要做好隨時被Fing出氈的準備就已足夠，玩法相當簡單。玩此氈最刺激的一剎，就在掟彎時，整個人快要Fing出界，介乎翻氈與不翻氈之間的時候。而對旁觀者來說，最開心當然就是睇住氈上的人齊齊跌落水的一刻啦！

出海暢玩

上落船地點：西貢碼頭

時　　　間：9:00am-5:00pm（日間8小時）

人　　　數：20人以下

費　　　用：暑假期間，平日$4,000起，星期六、日或公眾假期$7,500起。若超過20人每位收$150，套餐僅包香蕉船和Wakeboard，另加$1,500起可自選3款水上玩意。遊艇上另設電腦選曲卡拉OK和麻雀耍樂（建議最好一星期前預約）。

查　　　詢：9713 1595（阿添）

網　　　址：www.waketim.com