有海陸動物兵團幫手，廚房工夫話咁快搞掂晒！

平日喺屋企煮三餸一湯、白飯任裝都係我一腳踢，屋企嗰兩件（係，我係講緊叻生同叻仔）永遠唔會幫手！每次煮到大汗疊細汗之際，如果有啲可愛又實用嘅廚具幫手，身為家庭「煮」婦嘅我就會精神為之一振！最近我又有唔少開心大發現，就係一啲動物形廚具，好似鑊鏟、廚房剪刀及刨皮器等，一眾動物朋友將灰灰黑黑嘅廚房變成繽紛嘅動物園，就算要煮六道菜式嘅法國大餐或九大簋都精神晒！

紅色蟹鉗，活像巨型阿拉斯加蟹鉗，用嚟夾蟹肉伊麵就最啱，哈！$159（a）	食北海道長腳蟹，唔用呢個蟹腳形鉗真係對唔住自己囉！$60（b）	鯊魚擘大口、露出利齒？扮吓嘢啫！實際係刨薯仔器，而令薯仔皮肉分離，係中間嘅刀片。$48（a）
平日噬人唔眨眼嘅鯊魚，好心幫人磨利刀，只要將刀放响背鰭位推拉數下，利刀即現。$80（a）	眼仔細細嘅海蝦刨皮器，可刨薯仔、紅蘿蔔、青瓜等。$48（a）	熊貓隔熱手套，仲招財進寶添！ $80/對（a）
乳牛媽媽化身吸塵機，電動鼻孔一開，就可以吸走餐桌上嘅麵包碎，相當方便。$98（a）	長頸鹿廚房萬用刀 $177（a）	肥企鵝瓶蓋密封器 $22（b）
鱷魚先生都有善良一面，呢個平底鑊鏟方便反轉煎蛋，而鱷魚下巴可以拍蒜頭。$76（a）	青蛙仔鑊鏟，將美味餸菜炒到紮紮跳。$100（a）	企鵝油罌及Cute版企鵝仔醋瓶 （左）$160（右）$55（a）

查詢︰（a）2728 0206（b）2506 2888

叻生：75周年大富翁

細個成日同朋友仔玩大富翁，原來大富翁出咗都75周年啦！最新推出限量750套嘅「大富翁─革新版」，設計都可說係顛覆傳統，遊戲板塊由正方形變為圓形，而中間嘅多功能電子讀卡機，將原有「機會」及「命運」卡功能集合於一身，亦能計算玩家嘅身家總額，遊戲期間又會根據唔同情況而播放特別聲音，大增遊戲趣味性，非常過癮，我同叻仔依家晚晚都要玩過先安樂！

查詢︰2302 1221

叻仔：夏日Summer Fun活動

就快放完暑假，開始要收拾心情、準備返學lu，尋日畫畫班同學晴晴話，佢住嘅馬鞍山雅濤居樓下嘅購物商場搞咗個「夏日Summer Fun」活動，請咗好多間教學中心輪流舉辦活動，好似乒乓球滿分體驗，可以同星級教練學打波，英語拼音學Phonics，仲可以順道揀埋啱學嘅課程同課外活動添！不過我最想去現場嘅原因，係晴晴話可以免費玩大型吹氣彈床，等我表面上叫媽咪帶我去探住响馬鞍山嘅表姨媽，實際去跳吹氣彈床先！

查詢：2643 6332

叻太：白醋清潔家居

叫得做叻太，當然個袋好似多啦A夢咁有好多法寶，今日就同大家講吓白醋嘅用途，白醋除咗調味外，其實仲有清潔、去油及殺菌功效，係清潔家居嘅好幫手！大家可以試試以1:49嘅白醋開水，然後抹全屋傢俬，方便又環保，更唔會傷害傢俬表面。另外，又可以試試以白醋打救染色白色衫，以1:55嘅白醋混和清水，然後將被染色嘅衫浸透一晚，第二日衣服就會回復潔白啦！最後，想清潔廚房塊砧板？可以將兩湯匙白醋混和約200毫升清水，然後將廚房紙浸透再鋪响砧板上20分鐘，砧板上嘅黑垢和臭味都會徹底起清！做個醒目靚太就係咁簡單啫！