唔揀東京、唔去首爾，首屆喺亞洲舉辦嘅變形金剛博覽會BotCon，偏偏選擇喺上海舉行，睇嚟「人仔」嘅魔力，連身為外星人嘅變形金剛都擋唔住。唔只有23呎高嘅大黃蜂守門口，仲有逾二千款歷代變形金剛晒冷，加埋日本方面都仲未曝光嘅MP09洛迪文，都畀足面喺上海率先現身，恨死香港粉絲！

23呎大黃蜂守門口

由1994年創辦、每年一度喺美國舉行嘅變形金剛博覽會BotCon，堪稱全球最大型嘅老變朝聖會，今年啱啱先喺六月搞完，隨即八月移師上海再接再厲（展期由7月30至8月3日，地點為上海東亞展覽館）。大黃蜂唔只做守門大將軍，仲喺場內繼續做主角，不過變身美國跑車Chevrolet Camaro形態，而且唔係模型咁簡單，係真車實物，車廂落齊座椅、軚環，據知呢部靚車下年有得買。

MP洛迪文全球首展

變形金剛咁多角色，點可以畀大黃蜂一個威晒，現場就有二千款以上嘅變形金剛玩具列陣，新簇簇嘅電影版Special Edition當然唔少得，難得在日本Takara Tomy及美國Hasbro方面攜手合作，搵嚟多款古董級極品，包括1984年最初推出嘅G1系列，甚至再早期未用「Transformers」呢個嘜頭、仲掛住「Mirco Change」招牌嘅音波都搵到，唔到你唔服！回首之餘，大會仲全球首展MP09洛迪文嘅試辦，雖然未上色，但造型嘅完成度已經七七八八，仲有埋貨櫃車形態，大有機會成為下半年嘅必入之選。除此之外，場內仲有各式遊戲、動漫原稿，以及充滿中國風嘅老變展品，夠你睇足大半日（如果你有去到嘅話），惟有希望Takara Tomy及Hasbro唔好咁偏心，下年喺香港搞番次，仲可以食正電影第三集上畫嘅檔期喎！