細個和同學仔踢波，最討厭隔籬班的B仔經常批(月爭)掹衫；大個出嚟社會做事，最憎啲卸膊怪吓吓蒙混過關呃飯食。無論學堂抑或職場，個個茅招盡出，今日我都要出茅招！只因天氣太熱，請來大廚教煮幾道香茅飲料和美食，驅走熱氣，呢啲「茅」躉唔怕做啫！

洋名檸檬草（Lemongrass）的香茅，據說因帶陣陣檸檬香氣而得名。其支狀外形，色澤青綠，易於收藏在廚房裏，方便大廚隨時烹調，其中小記至愛的「冬蔭功」便需清新香茅來帶出獨特滋味。

煲水入饌防感冒

除了「冬蔭功」，香茅「招式」眾多，炮製飲品、做醬汁、醃菜，甚至做雪糕都掂，而在配搭食材方面更是一絕，無論配蔬菜、肉類、海鮮及家禽等都效果不錯。而據皇家太平洋酒店沙嗲軒主廚梁年方師傅說：「東南亞一帶的美食，好似新加坡、泰國、越南等，都好鍾意用香茅，我覺得佢味道清新又特別，而且一年四季都有，係廚師的好幫手。」另外，聽說泰國人還會用香茅煲水飲，以預防傷風感冒、消除飽滯，皆因這種香草除可開胃消暑外，更有助紓緩頭痛、喉嚨乾涸等不適，而將香茅造成汁塗抹在皮膚上，更是天然的蚊怕水，有佢傍身，天時暑熱無有怕。

入廚小貼士

1.香茅以色澤青綠、粗身為佳，香味會較為突出；烹調時要將乾的外皮剝去，並只用頭部一段，記得將刀放橫拍一拍，才會出味。

2.炮製炸雞時，記得注意油溫，一直用中火便可以，因過熱易燶，雞件裏面亦可能未完全熟透。

大廚小檔案：梁年方師傅

現為皇家太平洋酒店沙嗲軒主廚，入廚逾20年，一直專心烹調新加坡菜，拿手菜更是多不勝數，包括炒蘿蔔糕、沙嗲及咖喱魚頭煲等。

香茅特飲

材料（4人分量）

冰糖適量、薑 5-6片、香茅 5支、清水 4碗

做法：

1.香茅切去少許頭尾，拍頭部出味，再切成數段。

2.加入香茅、水、薑片煲半小時，再放冰糖拌勻即可。可熱飲、加冰或雪凍才飲。

香茅炸雞件

材料（4人分量）

雞（切件） 1隻、香茅（切段） 3-5支、乾葱（切碎） 3粒、生抽、魚露、鹽、雞粉及黑椒粉各適量

做法：

1.雞件跟香茅、乾葱、生抽、魚露、鹽、雞粉及黑椒粉等拌勻，醃味2至3小時。

2.雞件以中火炸至轉色浮面即可撈起。

酸辣蠔菇香茅清湯

材料（4人分量）

冬蔭功醬 1湯匙、青檸 1小個、蠔菇（洗淨切半） 2両、南薑及檸葉適量、香茅 2支、紅辣椒 2-3隻、乾葱1粒、清水 4碗

做法：

1.乾葱切片、紅辣椒切粒、香茅切片、青檸切半榨汁，備用。

2.乾葱、紅辣椒粒、香茅片、南薑、檸葉、冬蔭功醬、蠔菇、水、青檸汁等同煲15至20分鐘，即可飲用。