Kiki：
身邊好多人都知道我好鍾意鴨仔，亦常收到鴨仔公仔做手信。最近有同事為咗影防曬產品，專登走去深水埗搵沙灘道具，其中就有兩個迷你版的鴨鴨水泡，當我第一眼看到時，就已瘋狂地大叫好可愛，仲諗計仔想叫同事送畀我，不過由於佢自己亦都好鍾意，所以無論我花幾多唇舌佢都唔制，但就應承下次見到會買嚟送畀我喎！既然佢咁有心，我都無謂強奪人所愛啦！惟有影低佢留念啦！
Esther：
自己都算是一名鞋癡，雖然大家包括我都忙着掃夏季減價貨，但也不忘留意秋冬潮流新形勢。首先吸引到我注意的當然是網羅多個靚鞋名牌的連卡佛，看趨勢高踭始終是必然的流行元素，但設計再不是夏季那種玩閃、玩Shape的誇張設計，取而代之是Minimalism低調美，Elizabeth and James便帶來最佳示範作，只靠流線的鞋身與獨特的皮革，我已覺得靚到死。
Elaine：
上星期熱到跳舞，帶埋小狗去狗狗樂園游水，因為怕隻狗會中暑，所以我將礦泉水雪咗做冰，用毛巾包實；等小狗瞓喺冰上面歎「冷氣」。小狗第一次落水驚青到死，最叻嗰次游到六步仲係直線添，其餘時間就搏命掹住池邊。睇吓小狗呢張掙扎嘅相幾搞笑，差啲連身邊隻八哥狗都畀佢按埋落水。
小狗呀！冷靜啲啦！游多幾次就唔驚o架啦！